Сайланнган усталыкъны жашырынлыкъларына тюшюнюрча

Бу кюнледе Х.М. Бербеков атлы Къабарты-Малкъар  къырал университетни педагогика колледжинде  «Жаш профессионалла» WorldSkills-Russia – 2020 сайлау чемпионатны очный халда эришиулери башланнгандыла. Аны профориентациялы  бёлюмюне республиканы мектеплеринден 200 окъуучу бла устаз къатышхандыла. Ала педагогика колледжни мекямында болгъандыла, колледжни  студентлеринден волонтёрла къурагъан сейир чыгъармачылыкъ мастер-класслагъа къошулгъандыла, махкемени таматасы Фатима Ашабокова эм чемпионатны экспертлери бла ушакълашхандыла.  Вузну къонакълары  колледжни техника жалчытылыуун, коллективни жарыкъ кёллюлюгюн, студентлерини  профессионаллыкъларын бек жаратханларын букъдурмай айтхандыла. Аны юсюнден хапарны бизге КъМКъУ-ну пресс-службасы билдиргенди.

Жыйырма биринчи январьда  эрттенден тюшге дери  чемпионатха къатышханла  «Гитче класслада  окъутуу»  бёлюмде эришиуню «А» модуль заданияларын –  «Интерактив оборудованияны хайырланып дерсни хазырлау эм анга кёре аны бир бёлюмюн бардырыу»   –  тамамлагъандыла.  Чёп атыу бла  «Орус тил» предмет сайланнганды,  темасы  «Имя существительное».

Онбеш минутну ичинде  конкурсчула бусагъатдагъы билим бериу  технологияланы къурамларын эм дерсни башха-башха  бёлюмлеринде интерактив оборудованияны хайырлана билгенлерин  кёргюзтюрге керек болгъандыла. Белгилерге тийишлиди, Нальчик шахар округну 7-чи номерли орта билим берген махкемесини экинчи классыны окъуучулары  интерактив панельде заданияланы сюйюп тамамлагъандыла, дефтерлени орунларына  уа планшетлени хайырланнгандыла. Конкурсха къатышханла  асламысында  предмет материалны иги билгенлерин эмда сабийле бла бир тилли болалгъанларын кёргюзтгендиле.

Кюнню экинчи жарымында  студент къызла  «D» модульну – «Подготовка и проведение обучающего интерактива для родителей по решению ситуативной педагогической задачи» деген ишни тындырыргъа борчланнгандыла. Волонтёрла ата-аналача болгъандыла, ала бла ушакъны  темасы уа осал белги алгъандан сора сабийни чамланып сёлешиую эди. Жыйырма минутну ичинде классда ол  сылтаудан чыкъгъан болумну  сюзерге, педагог борчну салыргъа эм ата-анала бла бирге  тюз оноу этерге тийишли эди эмда ушакъны эсеплерин жазып жарашдырыргъа да.

Чемпионатха къатышханла сабий къауум бла  ишлеуню тюрлю-тюрлю методика онгларын кёргюзтгендиле.  Сёз ючюн, «юйретиучюле»  чыгъарманы окъурдан алгъа «сабийлеге» жангы сёзлени магъаналарын ангылатхандыла.  «Сабийле» тамсилни магъанасын къалай билгенлерин ангылар ючюн, шатык окъугъандан сора «юйретиучюле» тынгылагъанлагъа соруула бергендиле.  Ызы бла тамсилге кёре интерактив къангада  школгъа дери жыл сандагъы сабийлени сёлешиу тиллерин  айнытыугъа бурулгъан   тюрлю-тюрлю оюнла бардырылгъандыла. Эндиги юйретиучюле «Жаш профессионалла» сайлау чемпионатны чегинде  экспертлеге низам жаны бла ишлей билгенлерин да кёргюзтгендиле.

Бу магъаналы проектни андан ары барыууна КъМКъУ-ну медицина эмда информация технологияла бла экономика колледжлери къошулгъандыла.