Адамны башын хайран этген, эсиртген затла шайтанны ишлеридиле

Арт жыллада, жарсыугъа, миллетни бир-бир келечилери ахчагъа ойнаргъа тюзелип, юйюрлерине, сабийлерине палахлыкъ саладыла. Аллай адамланы арасында эр кишиле. тиширыула да бардыла. Юйлерине хакъны келтирмей, бир тюрлю болушлукъ этмей, аны бла бирге уа мюлкню сатып ахча этерге кюрешген къоншуларыбызны, жууукъларыбызны юслеринлен эшите тургъанбыз. Алай ислам дин ахча оюнлагъа къалай къарайды?

Аны бизге Хасания элни иймамы Мисирланы Тимур хажини ангылатырын тилегенбиз:  

-  Хау, арт кезиуде ахчагъа оюнла кенг жайылыпдыла. Тамата, жаш деп къарамай ойнайдыла эр кишиле, тиширыула, сабийле окъуна. Аланы арасында намаз этген, ораза тутхан дин къарындашларыбыз да болгъанлары, ала кюнден-кюннге кёбейгенлери бютюнда къайгъыртады.  Халал бла харам бирге келмейдиле, аланы жоллары башхады. Аны айтханым, намаз этип, Аллахны аллында борчунгу толтуруп, ызы бла уа ол къоймагъан иш бла кюрешген неге ушайды?

Аллахутала Сыйлы Къуранда былай айтады: «Эй, мукъминле, адамны башын хайран этген, эсиртген  затла  шайтанны ишлеридиле. Аладан кери туругъуз, насыплы болургъа сюе эсегиз.  Шайтан ичгини,  адамны тели этген затланы жайып, сизни ичигизге кёрюп болмауну, душманлыкъны жаяды, ачыуландырады, Аллахны унутдурады, намаздан тыяргъа сюеди. Муну эшитип, сиз тыйылмазмысыз? Аллах буюргъанны, аны келечиси айтханны этигиз».

Былайда ичгини, наркотиклени, адамны башын хайран этген затланы юслеринлден айтылады, алагъа уа  ёч оюнла да киредиле. Бу аят ахча оюнла шайтанны сюйген иши болгъанын ангылатады. Аны бла кюрешген бизни Жаратханны буйрукъларындан, жорукъларындан чыгъады, нёгерге шайтанны алады.

Адам ёч оюннга кесин нек бергенин, анга не сылтау бла алдатханын ангыларгъа тийишлиди.   Биринчиден, ол шайтанны  ишине бойсунады. Экинчиден а, бир тюрлю къыйын салмай, ишлемей терк окъуна бай болургъа излейди.   Алай бу ырысхы анга  харам болуп келгенди. Ахчагъа оюн бардыргъан жерлени къураргъа жер, мекям бёлген, ойнагъанлагъа аш-суу элтген да харамды. Аллахутала алагъа налат береди.

Бизни Жаратхан ёч, ахча салыннган оюннга жууукъ барма дейди.  Башха тюйюлдю -  картлагъамы, казинода рулеткагъамы неда, биздеча, аппаратлагъамы   къоратаса мюлкюнгю, ала барысы да муслийманнга эркин этилмегендиле. Файгъамбар былай дегенди: «Карт ойнап, намазгъа тургъан адам ушайды от бла тонгузну къаны бла абидез алып, Аллаха баш ургъаннга».

Дагъыда нарды деген оюн да барды. Орамгъа чыкъсанг, ишлери болмагъан эр кишиле аны да алларына жайып, хахай-тухай этип кюрешгенлерин кёресе. Алай бу оюн да харамды исламда. Заманын бир тюрлю хайырсыз, бошуна къоратхан кесине жаханимге жол ачханын билсин.

Мухаммад файгъамбар, Аллахны саламы анга болсун, былай дегенди: «Нард ойнагъан ушайды тонгуз этге тийип, аны къаны бла къолларын жуугъаннга».  (Муслим). Ислам ма аллай бирге сыйын тюшюреди, кёрюп болмайды аны,  харам жаныуар бла тенг этеди.  

Арт кезиуде уа спортда хорларыкълагъа ахча салып, файда къытаргъа кюрешгенле да жайылып барадыла. Республикада аллай харам иш бла кюрешген ненча жер барды?  Ол шайтан оюнлада къытханла, къытдыргъанла да бардыла. Алай  эки къауум да терсдиле.   Бири къытып къууаннгандан, башхасы уа ахчасын жоюп ачыудан тели боладыла, башлары кетедиле, кеслерини жашауларын юзгенле да бардыла. Кёресиз,  Аллах харам этген зат хайыр, ахшылыкъ, къууанч бир заманда да берлик тюйюлдю.

Ёч оюн адамны тартханлай турады, аны  ичинден ашайды, бузады, къуруда анга итинип турурча этеди.  Адам азартсыз болалмай къалады. Алай бла уа   ахчаны тилейди, бермеселе, сыйырады, урлайды, юйюнде болгъан затланы сатады. Ол  не гюняхдан да артха турлукъ тюйюлдю.  

Шёндю уа компьютер оюнла жайыладыла. Жаш адамла ойнай кетип, башлары кетип, атасын, анасын, жууукъларын ёлтюрюрге чапхан кезиуле къалай кёп болгъандыла. Быллай  шартлагъа халал деп къалай айтыргъа боллукъду?

Муслийман кесин ол дуниягъа хазыр этерге борчлуду. Аллах бизге саугъалагъан заманны бошуна къоратмагъыз, зыраф этмегиз,  билип тургъанлай, жаханимге жол къурамагъыз кесигизге. Аллах  тюз  жолгъа салырын  тилегиз, тобагъа къайтыгъыз. Намаз къылыгъыз, ораза тутугъуз, кесигизни, жууукъларыгъызны-ахлуларыгъызны   харамдан сакълагъыз, Къуран окъугъуз, тилекле этигиз. Бизни Жаратханны ыразылыгъын табып, бу, ол дуниягъа да хайырлы ийман, билим, къадар да берсин Аллахутала барыбызгъа да.