Байрамла чурумсуз ётерча

«Россети Шимал Кавказ» компанияны Къабарты-Малкъарда бёлюмю «Каббалкэнергода» баланс комиссияны кенгешин бардыргъанды. Анда быйыл озгъан онбир айны ичинде ишни эсеплери чыгъарылгъандыла. Эм биринчиден, сёз электрокюч сетьледе къоранчланы азайтыуну юсюнден баргъанды, деп билдиргендиле компанияны пресс-службасындан.

Бу жаны бла энергетикле иги къармашханларын белгилерчады; отчёт кезиуде ала керекли жумушланы толусунлай тындыргъандыла. «Каббалкэнергону» башчысы Муртаз Каров бёлюм саулай къыралда эм иги ишлеген электрокюч комплекслени санына къошулгъанын айтып, аны бла тынчайып къалыргъа жарамазлыгъын да чертгенди, жылны ма алай жетишимли бошаргъа чакъыргъанды.

Компанияны башчысыны буйругъу бла, Жангы жылны байрамларын бир тюрлю чурумсуз ашырыргъа кереклиси да белгиленнгенди жыйылыуда. «Бу кюнледе хайырланыучуланы ток бла жик-жиги бла жалчытып турургъа борчлубуз. Бир тюрлю чурум чыкъса уа, аны терк окъуна кетерирге хазыр болургъа керекбиз», - дегенди Муртаз Каров.

«Каббалкэнергода» эмда аны районлада бёлюмлерини хар биринде электромонтёрланы бригадалары, техника жаны бла специалистле, оноучула да  кече-кюн дежурствода боллукъдула. Саулай айтханда, электросеть комплексде болумну жюзден артыкъ адам контрольда тутарыкъдыла, жыйырмадан аслам бригада уа къайсы жерге да мычымай жетерге хазыр боллукъдула.

Эсигизге сала айтсакъ, Къабарты-Малкъар Республикада электрокюч бла къоркъуусуз жалчытыу жаны бла штаб ишлейди. Аны, терк сёлешип, билдириу этерча телефон номери да барды: (8662) 77-19-45.