Тынгылы ремонт ючюн льготаланы юсюнден

Кёп фатарлы юйлеге тынгылы ремонт этиу ючюн тёленип башлагъанлы бир ненча жыл болады. Аны юйде жашагъанла бары да берирге борчлудула. Ол кеси да фатарны ёлчемине кёре тергеледи. Бирлеге ол артыкъ ауур кёрюнмей эсе да, къолайсызыракълагъа неда кеслери жашагъан абаданлагъа ол, баям, алай да болмаз. Ма ол себепден 2016 жылда 39-РЗ номерли «Къабарты-Малкъар Республикада талай категория гражданлагъа къырал социал себеплик этиуню юсюнден» закон бла бу ишде льготала сингдирилгендиле, деп айтылады КъМР-ни кёп фатарлы юйлеге тынгылы ремонт этиу жаны бла регион Фондуну Интернет-сайтында.

Бу законнга тийишлиликде ишлемеген пенсиячылагъа бу тёлеу азайтылады. Жыл санлары жетмишге жетгенле аны жаланда экиден бирин тёлерикдиле, сексенден атлагъанла уа андан толусунлай эркин этиледиле.

Компенсацияны ёлчеми жашау журту тынгылы ремонт этиллик бир квадрат метрини багъасына эмда субсидияланы тергегенде хайырланылгъан регион стандартны ёлчемине кёре чыгъарылады. Сёз ючюн, буруннгу жыл тёлеуню багъасы (бир квадрат метр ючюн) 6 сом 22 капек эди. Сагъынылгъан стандарт а кесинлей жашагъаннга – 33, экеулен болгъан юйюрлеге – 21, юч адам болгъан юйюрлеге уа – 18 квадрат метр эди.

Алай бла жыл санлары жетгенле социальный къоруулау аралагъа неда МФЦ-гъа заявление элтселе, компенсация аны ызындан келген айдан берилип тебирерикди. Ол кеси да борчлары болмагъанлагъа. Башхача айтханда, заявление жазгъандан сора адамгъа тёлеуюню (жыл санына кёре) 50 неда 100 проценти артха къайтарыллыкъды.

Заявление бла бирге паспортну, СНИЛС-ни, сберкнижканы (неда ахча артха къайтарыллыкъ счётну номерин), тынгылы ремонт этиу ючюн ахыр айда тёлеуню квитанциясыны эмда борч болмагъанына шагъат этген къагъытны копияларын берирге эмда пенсиячы бла бирге ол фатарда кимле жашагъанларын да билдирирге керекди.

Компенсация алыучу адам быллай ремонт ючюн юч айны тёлемей туруп борч этсе, анга ахчаны къайтарыу тыйылады. Дагъыда бу адам ишге орналса, тургъан юйюне иеликден кетсе, аны фатарында пенсиягъа чыкъмагъан адам регистрацияны этсе, жашагъан жерин алышындырса, ауушса неда белгисиз тас болса да компенсация тёленирик тюйюлдю. Быллай шартланы юсюнден социал къоруулау органлагъа эки ыйыкъны ичинде билдирирге керекди.

Андан сора да, 50 процент компенсацияны гражданланы быллай  категориялары алыргъа боллукъдула:

- Уллу Ата журт урушну эмда аскер къаугъаланы ветеранлары эм инвалидлери. Ала ауушхан эселе,  аланы юйдегилери;

- Ич ишлени органларыны, от тюшюуге къажау службаны, уголовный-толтуруу системада органланы эмда учрежденияланы кеслерини борчларын толтургъан кезиуледе сакъат болгъан келечилери. Аллай кезиуледе ауушхан эселе,  аланы юйдегилери;

- «Блокадный Ленинградда жашагъан» деген белги бла саугъаланнганла, кеслери да сакъатла болгъанла;

- Экинчи битеудуния урушну кезиуюнде фашистле къурагъан концлагерьледе, геттолада (акъылбалыкъ болмай) кечиннген сакъат гражданла;

- Чернобыльде атылгъан АЭС-ни хатасындан лучевой ауруулары болгъанла (ала ауушхан эселе,  компенсация юйдегилерине бериледи), анда аварияны кетериу ишлеге къатышханла эмда ол тийреледен башха жерлеге кёчюрюлгенле (ол санда сабийле да);

- «Маяк» производстволу биригиуде 1957 жылда аварияда тышына чыкъгъан радиацияны эмда Теча суугъа радиоактив къалгъан-къулгъанла тёгюлгенини хатасындан лучевой ауруу къозгъалгъанла эм сакъат болгъанла. Дагъыда ол аварияны кетериу ишлеге къатышханла эмда ол тийреледен башха жерлеге кёчюрюлгенле;

- «Эм къоркъуулу» сфералада уруннганла. Аллай адамлары (юйюр таматала) ауушханланы юйдегилери;

- Семипалатинск полигонда ядерный сынау ишлени кезиулеринде радиация облучение алгъанла;

- 1 эм 2 группалары болгъан сакъатла;

- Юйюрлеринде сакъат сабийлери болгъанла;

Компенсация энтта да талай категориялагъа бериледи. Урунууну эмда Аскер къуллукъну ветеранларына, политика репрессияланы сынап реабилитация этилгенлеге, кёп сабийли юйюрлеге эмда элледе билим бериу учрежденияланы специалистлерине уа ол тёленмейди.

Бу иш бла байламлы толу информацияны кёп фатарлы юйлеге тынгылы ремонт этиу жаны бла регион операторну www.kapremontkbr.ru Интернет-сайтында билирге боллукъду. Ким къаллай компенсациягъа тийишли болгъанын эмда аны къалай алыргъа боллугъун а социальный къоруулау аралада сорургъа керекди.