Асыл адам, окъуучуну жюрегине жол излеген журналист Къалам къарындашыбызны эсгере

Мен Аппайланы Музафар бла газетде кёп жылланы ишлегенме. Анча заманны ичинде аны сабырлыгъына, тёзюмлюгюне къуруда сейир этгенлей тургъанма. Кёрмегенме мен аны ачыуланып, къаты сёлешип, биреуге хыны этип да. Аны ол ышанларын коллективде барысы да белгилеп айтхандыла. Бир жол а, туугъан кюнюн белгилегенибизде, газетибизни баш редактору Атталаны Жамал энчи белгилегенди.

-Музафарны башхалада болмагъан, ким да сукъланырча, бир аламат ышаны барды: тюз, терс этилсе да, не къыйын, тапсыз кезиуюнде да, ачыуланмай, къызмай: «Манга уллу сёлешип, тырман этип, чёкдюрюрге, хорларгъа кюреше эсегиз, мен а тёзюп хорларма»,-дегени. Уллуду чыдамлыгъы. Сабырлыгъы бла кёплеге юлгюдю»,-деп айырып айтхан эди.

Газетде ишлеген къыркъ жылны ичинде Музафар уллу сынау жыйышдыргъан эди. Корректордан башлап баш редакторну орунбасарына дери кётюрюлгенди. Аны журналистикагъа биринчи тюзетгенледен а Къулбайланы Алий болгъанды.  Музафар анга ыразылыгъын къуруда айтханлай туруучу эди. «Черек районнга  командировкагъа биринчи кере Алийни биргесине баргъанма. Анда мени баш зоотехник бла танышдырып: «Бу жашха газетге материал хазырларгъа болушсанг  эди»,-дейди.  Манга уа: «Ашыкъмай, хар затны юсюнден да тынгылы билирге кюреш»,- деп юйретеди. Малчыла бла да тюбешдиреди. Къысхасы, районда кёрген затларыма къууана, тынгылы материал алып, редакциягъа алай къайтабыз. Газетде ол корреспонденциям чыкъгъандан сора уа, летучкада аны махтагъан да этедиле»,- деп эсгергенди Музафар.

Андан ары аны усталыгъы ёсе баргъанды. Энчи корреспондент, эл мюлк бёлюмню таматасы болуп тургъанда да эллеге терк-терк баргъанды. Малчылагъа, сабанчылагъа тюбеп, аланы юслеринден жазгъанды. Бир-бир очерклерини, статьяларыны жигитлери артда аны шуёхлары болуп къалгъандыла. Алай болмай да амалы жокъ эди: ол элли уруннганланы жашауларыны, аланы жарсыуларыны, жетишимлерини, тюбеген къыйынлыкъларыны юсюнден да жазгъанды.

Аны иш кёллюлюгюне да сейир этерча эди. Районнга барып келсе, газетге керекли материалны кечеле бла жазып, хазыр этип келтиргенди. Ишлерге уа ол гитчеликден юйреннгенди. Школда окъугъанында окъуна нартюх сабанлада уруннганды, картоф ёсдюргенди.  «Къыйынлыкъла мени бир затдан да къоркъмазгъа, ауур ишден къачмазгъа юйретген эдиле. Ол а мени эл мюлкде ишлегенлеге бютюн жууукъ этгенди»,-деучю эди Музафар.

Редакцияны жамауат ишине да тири къатышханды – кёп жылланы  профсоюз организациягъа таматалыкъ этгенди. Газетде ишлегенлени сабийлери жыл сайын Жангы жылгъа саугъала этмей къоймагъанды, школчулары болгъанлагъа уа лагерьге путёвкала алыргъа кюрешгенди. Бир кишини юбилейин да белгилемей къоймагъанды. Даулашла чыкъгъанда да, сабырлыгъы, оюмлулугъу бла къайгъысыз къутулургъа болушханды.

Музафар юй бийчеси Малкъондуланы Асият бла тёрт сабий ёсдюргендиле. Ма аланы, аладан туугъанланы къадарлары да кёбюсюнде аны тири къармашыууна, алагъа къайгъыра билиуюне кёре боллугъун ол эсинден бир заманда да кетермегенди. Барысын да тюз жолгъа салгъанды, иш кёллюле этип ёсдюргенди. Бюгюнлюкде аталары биргелерине тюйюл эсе да, ала ол тапсыз неда къылыкъсыз иш этген эди деп, бир заманда да кишиден да эшитирик тюйюлдюле. Асыл аталары бла къачан да ёхтемленнгенлей турургъа эркиндиле. 

 

Текуланы Хауа.
Поделиться: