Пособияла ансанны тургъан жерлерине келедиле

Россейни пропискалары болмагъанлай, къыралны бир тюрлю жеринде жашагъан гражданларына Пенсия фонддан тёлеулери тургъан адреслери бла бериледи, аны юсюнден тюрлениуле пенсия бла жалчытыу системагъа мартда кийирилгендиле. Инсан социальный пенсия алыр ючюн, Россейде жашагъаныны юсюнден фондха заявление жазып неда социальный жумушланы жалчытыу, тюзетиу эм билим бериу учрежденияладан алгъан документлери бла билдирирге боллукъду.

Социальный пенсия гражданлагъа жангызда ала Россейде жашай эселе бериледи. Тюрлениуле кийирилгинчиге дери адамланы мында тургъанларына шагъатлыкъгъа паспортларын регистрация этилгенини юсюнден белигиси бла неда МВД-дан къагъыт келтирирге керек эдиле. Энди регистрациялары болмагъан пенсиячыла Россейде жашагъанларыны юсюнден жылгъа бир кере кеслери заявление жазып билдирирге борчлудула. Ала медицина, тюзетиу неда билим бериу учрежденияда эсепде бар эселе, заявление изленирик тюйюлдю, ол бютюнда ёксюз эм ата-аналары къарамай къойгъан сабийлеге магъаналыды.

Пенсия бла жалчытыуну юсюнден федеральный законнга тийишлиликде социальный пенсияны алыргъа эркиндиле:

- сакъатла, чекленнген онглары болгъан сабийле, гитчеликден да сакъатлыкълары болгъан адамла;

- ата-аналарындан бири неда ала экиси да ёлген сабийле 18 жыллары толгъунчугъа дери, андан сора да – очный халда окъуй эселе;

- ата-аналары белгисиз балала;

- Северде жашагъан аз санлы халкъланы келечилери 55 жыл (эр кишилеге) эм 50 жыл (тиширыулагъа) толгъанындан сора, алагъа пенсия къартлыкъ бла байламлы бериледи;

- страховой пенсия алыргъа эркинликлери болмагъан 65,5 жыллары толгъан эр кишиле эм 60,5 жыллары толгъан тиширыула, ала да тёлеулерин къартлыкъ бла байламлы аллыкъдыла;

- Россейде 15 жылны ичинде дайым жашагъан тыш къыраллы эм гражданстволары болмагъан 65,5 жыллары толгъан эр кишилеге эм 60,5 жыллары толгъан тиширыулагъа пенсиялары къартлыкъ бла байламлы берилликди. 

Бюгюнлюкде социальный пенсияла 3,2 миллион инсаннга бериледиле, аланы асламысы – 98,5 проценти ахчаларын сакъатлыкъ неда къарагъан адамлары болмагъаны бла байламлы аладыла. Пенсия системада 2019 жылда болгъан тюрлениуле пенсияланы бу къауумларына къатылмагъандыла. Алагъа пенсия жыл саннга къарамай бериледиле.

 

Кульчаланы Зульфия
Поделиться: