Жаш адамла билимлерин ёсдюрлюкдюле, проектлерин да къорууларыкъдыла

6-8 ноябрьде Архызда «Маданиятланы арасында ушакъ» деген регионла аралы жаш тёлю илму-практика форум боллукъду. Анга Шимал  - Кавказ федерал округдан (СКФО)  жюзге жууукъ адам къатышырыкъды. Ол Халкъ мюлкню эм къырал къуллукъну россейли академиясыны (РАНХиГС) Шимал Кавказда бёлюмю бла Къарачай-Черкесни Миллетлени ишлери, асламлы  коммуникацияла эм басма жаны бла министерствосу къурап бардырылады. 

Программагъа кёре, тюбешиуле, «тёгерек столла», мастер-классла,  билимни сынау жаны бла жаш тёлю оюнла, спортдан эришиуле да ётерикдиле, ахырында уа концерт  боллукъду.

Форумну ишине  СКФО-ну экспертлери – КъЧР-ни миллетлени ишлери, асламлы коммуникацияла эм басма жаны бла министрини къуллугъун толтургъан   Хубийланы Ислам, КъМР-ни  граждан обществону институтлары бла байламлыкъла къурау эмда миллетлени ишлери жаны бла министри Анзор Курашинов, РАН-ны социал-политика тинтиуле жаны бла институтуну  бёлюмюню таматасы Юлия Зубок, РАНХиГС-ни регион тинтиуле эм урбанистика арасыны илму-излем лабораториясыны таматасы Константин Казенин,

Къабарты-Малкъар къырал университетни болжаллы халда   ректоруну къуллугъун толтургъан Хусейн Кушхов, Халкъ мюлкню эм къырал къуллукъну россейли академиясыны Шимал Кавказда бёлюмюню ректору Азамат Тлисов, депутат,       

Георгиевск шахар округуну Думасында экономиканы айнытыу, предпринимательство эм инвестицияла  жаны бла комиссияны таматасы,  «РФ-ни Эм иги таматалары» деген  битеуроссей  конкурсда хорлагъан Артур Инджиев, СО-Аланиядан  коммерциялы организацияла болмагъанлагъа болушхан ресурс араны таматасы  Алан Габисов, «Россети Северный Кавказ» компанияны асламлы басма органла бла байламлыкъла жюрютген бёлюмюню баш специалисти Амиран Дзугов эмда башхала  къатышырыкъдыла. 

Форумну ахырында жаш адамла РАНХиГС-ни  специалстлери да болушуп  хазырлагъан    проектлерин къорууларыкъдыла. Биринчи жерлени алгъанла уа саугъалагъа тийишли боллукъдула.   
.

Магометланы Сулейман
Поделиться: