«Айырыула къырал тынчлыкъ келтирликлерине ышанып келедиле»

324-чю айырыу участкада эсепде тургъан 1115 адамдан 17 мартда 13 сагъатха 90 процентге жууугъу къол кётюргендиле. Айырыу участка Огъары Жемталаны орта школуну мекямында орналгъанды. Къол кётюрюу къалай баргъанын сюзген жамауат къараучула законлагъа бузукълукъла, терсликле ачыкъламагъандыла.

Элни администрациясыны башчысыны къуллугъун толтургъан Глашланы Мухадинни бизге айтханына кёре, къол кётюрюуню аллында  элде уллу къурау-ангылатыу иш бардырылгъанды.

- Тамамланнган жумушла хайыр келтиргендиле. 15 мартда окъуна айырыучуланы жартысындан асламы (586 адам) келген эдиле участкагъа. Алгъын заманладача, байрамгъача,  жыйыла эдиле. 17 мартда 13 сагъатны эсеплерине кёре, айырыучуланы 90 проценти этгендиле кеслерини сайлауларын,-дегенди ол бизге.

Адамла шёндюгю болумну ангылап, айырыула къырал тынчлыкъ келтирликлерине ышанып келедиле.  «Таматала, жаш адамла да келедиле. Таматаларыбыз политикадан ангылаулары болуп, кеслерини оюмларын да айтадыла»,-дегенди Мухадин.

Хар жердеча, мында да саулукъларына кёре онглары болмагъанла сайлауларын юйлеринде этгендиле. Кеслери баралмазлыкъларын алгъадан билдиргенлеге комиссияны келечилери юйлеге жюрюгендиле. «Тюнене жауун кюн болуп къалгъанды. Элни депутатлары айырыучуланы машиналары бла келтирип, онг этгендиле, сау болсунла», - деп билдиргенди ушакъ нёгерибиз.

 РФ-ни Президентин айырыулагъа аталып, Огъары Жемталаны спорткомплексинде дзюдодан эришиуле да къуралгъандыла.

Тикаланы Фатима.

Поделиться: