Бек биринчи борчу – ана тилни сакълау

Миллет тилледе чыкъгъан изданияланы борчлары окъуучуларына бола тургъан ишлени юслеринден билдиргенинден тышында, ана тилни, аны сёз байлыгъын тазалай сакълауду, халкъны айтхылыкъ адамлары бла шагъырей этиудю. «Заман» газет да ол сыйлы борчну толтурургъа итинеди. Биз окъуучуларыбызны араларында ала газетни бетлеринде къаллай материалланы жаратханларыны, журналистлерибиз къаллай темаланы бегирек ачыкъласала сюйгенлерини юсюнден соруу бардыргъанбыз. Аны эсеплери бла шагъырей этерге сюебиз.

Ала бла Музыка театрны солисти Гергъокъаланы Халимат оюм этгенден, газетибиз ишин не жаны бла да аламат бардырады. Ачыкъ айтханда, газет миллетни тарыхын, аны излемлерин, жарсыуларын бла къууанчлы кюнлерин суратлагъан, аны келлик тёлюлеге сакъларыкъ баш амалды. Сабийлерибиз, туудукъларыбыз, газетлени бир ауукъ заман алгъа чыкъгъан номерлерин ачып, бюгюннгю кюнню юсюнден кеслерине кёп жангы зат билликдиле. Анга шагъатлыкъны уа «Эски сурат» деген рубрика этеди, къалай хычыуунду миллет кийимле кийген ариу, назик къызларыбызгъа, жигит жашларыбызгъа, огъурлу ынналарыбызгъа бла аппаларыбызгъа къараргъа. Нени къошарыкъ эдинг, къаллай материалла асламыракъ болсала игиди деген соруугъа жууап бере уа, мен юйюрлени, бютюнда жаш юйюрлени, белгили болмай, алай ишлеринде жетишимли, юлгюлю адамларыбызны юсюнден аслам жазылса сюерик эдим. Жангы, умутландыргъан инсанланы юслеринден окъугъан не мутхуз кюнде да кёлюнгю кётюреди, дейди. КъМР-ни Культура министерствосуну бёлюмюню баш специалисти-эксперти Акъайланы Лейля да газетни бек сюйюп окъугъанын билдиреди. Бютюнда уллу хурмет а аны бетлеринде тарыхыбызны, тутхан ишлеринде атларын айтдыргъан инсанларыбызны юсюнден бир башха жерде табылмазлыкъ материалла басмаланнганлары ючюн этеди. Спортда, культурада, илмуда, башха сфералада жетишимли жашларыбызны, къызларыбызны юслеринден статьялагъа къууанады, ала бла ёхтемленеди. Энчи уа Ата журт урушха, башха къазауатлагъа къатышхан жигитлерибизни юсюнден статьяланы багъалайды. Жангызда  акъсакъалларыбызны, аланы жашау жолларыны, юйюрлерини юсюнден кёбюрек окъургъа сюерик эдим, дейди. Кёчгюнчюлюк тарыхыбызны бушуулу бети болгъанды. Жаш адамла, сабийле къыйынлыкъда адамлыкъларын тас этмеген ата-бабаларабызны эсгергенлей турурча, киши жеринде къыйынлыкъ чегип, сынмай, бюгюлмей, туугъан жерине къайтып, жангыдан от жагъа тиргизген къартларыбызгъа кёбюрек эс бёлюнсе излейме. Сора, юриспруденция жаны бла материалла асламыракъ басмалансала, жамауатабызны бу жаны бла билимин ёсдюрюрге себеплик этерик эди, деп чертеди.

Дзюдодан спортну устасы Гуппойланы Алина да «Заманда» басмаланнган материалланы жаратханын, аланы кереклиге да санагъанын билдиреди: «Бусагъатдагъы жашауда инсан тёгерекде бола тургъан затланы билирге, ангыларгъа керекди, ол аны хар не жаны бла да айныууна уллу себепликди. Газетде уа политика, право, культура эм башха сферала толу суратланадыла. Ол неда бу тема артыкъды неда бу проблема уа аз тинтиледи, деп айталмайма. Мен дагъыда жаратханым, материалла асыры уллу болмагъанлай, къысха, алай теманы тынгылы ачыкълагъанларыды. Суратла тюрсюнлю болгъанлары да кёзге хычыуунду. Спорт жашаууму кесеги болгъаны, аны бек сюйгеним себепли, аслам эс бу жаны бла чыкъгъан материаллагъа бёлеме. Сёзсюз, спортчуланы юслеринден чыкъгъан статьяланы бегирек окъуйма, жашларыбызны бла къызларыбызны хорламлары гитчелеге да юлгюдю. Аланы юслеринден не къадар кёп жазылса, ол къадар игиди деп ойлайма».