Къабарты-Малкъарны Башчысы Казбек Коковну республиканы жамауатына Россейни Президентин айырыула бла байламлы чакъырыу сёзю

Къыралыбызда Россей Федерацияны Президентин айырыула башланнгандыла. Ала Россейде сегизинчи кере бардырыладыла, кеслери да  кёп миллетли деменгили къыралыбызны шёндюгю дунияда тарых жолун белгилейдиле. Ол Россей Федерацияны хар инсаныны да ёз сайлаууду.

Республикабызны айырыу участкалары эрттенликде 8.00 сагъатдан ишлеп башлагъандыла. Юч кюнню ичинде – 15,16,17 мартда - ала эрттенликде 8.00 сагъатдан ингирликде 20.00 сагъатха дери къол кётюрюрге келгенлеге ачылып турлукъдула.

Къабарты-Малкъар Республиканы жамауаты бу жол да, хар замандача, Ата журтха сюймеклигин бла кертичилигин, инсанлыкъ жууаплылыгъын, бирлигин бла бир ниетлилигин кёргюзтюрюгюне ишексизме.

Багъалы жерлешлерим! Айырыу участкалагъа келип, сайлауугъузну этерге чакъырама!