Алчыланы санында

Кёп болмай Москвада  Экспоцентр комплексде ашарыкъланы бла ичкилени «Продэкспо» деген  31-чи халкъла аралы  кёрмючю  бардырылгъанды. Анга  Къабарты-Малкъардан «Каббалкптица» предприятие да къатышып, алчы жерге тийишли болгъанды. 

Даражалы кёрмючде жыл сайын дунияны кёп къыралларындан 2500-ден  аслам предприятие ашарыкъларын  ачыкълайдыла. Къараучуланы саны уа жетмиш мингден атлайды. Бу жол да Россейни регионларындан  бла тыш къыралладан танг кесек предприятие бар эди.  Ол санда «Каббалкптица» биригиу продукциясын толуракъ ачыкъларгъа онг тапханды. Ол чыгъаргъан ашарыкъланы арасында къыймала, сарделькала, сосискала да болгъандыла.

Алай бла, «Эм иги ашарыкъ-2024» жаны бла предприятияны тогъуз тюрлю продукциясы сайланнганды. Аладан хар бири да алтын майдалгъа тийишли кёрюлгендиле. Аш-сууну  энчиликлерине кёре, «Каббалкптица» «Эм иги  предприятие-2024» кубок бла  саугъаланнганды.
 

Поделиться: