«Президентибиз салгъан борчла толтурулмай къаллыкъ тюйюлдюле»

КъМР-ни Башчысы Казбек Коков  Россейни Президенти Владимир Путинни Дмитрий Киселёвха берген интервьюсуна къарап, аны юсюнден кесини оюмун телеграм-каналында жазгъанды.

«Уллу эс буруп тынгылагъанма Президентибиз Владимир Владимирович Путинни айтханына. Ол къырал башчыны Посланияда белгиленнген уллу экономика тюрлениулени магъаналылыкъларына тюшюндюреди.

Ушакъны экономика сорууладан, туризмден, жолла ишлеуден башланнганын эмда  санкцияланы болумунда къыралны экономикасын  къыйматлы этерик амаллагъа, ызы бла уа халкъны санын ёсдюрюуге бла сабийли юйюрлеге тутхучлулукъ этиуге кёчгенин белгилерчады.

«Сабийлери болгъан юйюрлеге болушуу жаны бла битеу белгиленнген мадарланы алып къарасакъ, алты жылны ичинден биз 14 триллион сомгъа дери къоратыргъа мурат этебиз»,- дегенди Президент.

Эсигизге салайым: бизни республикада бир ёлчемли пособие 140 мингден аслам сабийни ата-аналарына тёленип башланнганды.

2020-2023 жыллада сабийли юйюрлеге, уллудан тутханда уа – саулай юйюрлеге –  социал болушлукъну 2020-2030 жыллада ёсюп башлагъан ёлчеми, бюгюнлюкде да тохтамагъанын кёребиз. Къырал ма бу институтну, Россейни тутхучлу кесегинча, къаты къоруулайды. Президент «Юйюр», «Узакъ ёмюрлюлюк эмда тирилик», «Россейни жаш тёлюсю» деген жангы миллет проектлени башларгъа кереклисин ма аны ючюн айтханды. Аны къой, юйюрлеге къыралны жанындан тутхучлулукъ этиуню мадарлары билим бериуню, саулукъ сакълауну, спортну, маданиятны айнытыуну, жашау журтла ишлеуню, тапландырыуну   программалы документлеринде да белгиленедиле.

Президентни сабийлени юйретиуге ол кёзден къарагъаны хар юйюрге да къырал болушлукъ жетеригине ышандырады. Владимир Владимирович Россейни экономика болуму терк игилене баргъанын чертгенди. Бюгюнлюкде окъуна къыралыбыз экономикалары кючлю къыралланы араларында 5 жерни алады.

«Биринчи кезиуде бизге Федерал Жыйылыугъа Посланияда салыннган борчланы толтурургъа керек боллукъду. Планларыбыз уллудула. Экономиканы, социал бёлюмню айнытыу, аналагъа, сабийлеге, сабийлери болгъан юйюрлеге, пенсиячылагъа тутхучлулукъ этиу жаны бла да шарт борчла салыннгандыла. Ала уа экономиканы халине кёре толтуруллукъдула»,- дегенди Къырал Башчы.

Президентибиз салгъан борчла толтурулмай къалмазлыкъларына ишексизме».