Россейли эришиулеге къатышырыкъдыла

Бу кюнледе Нальчикде битеустильли каратеден Миллет гвардияны ОМОН «Вершина» эм СОБР «Эльбрус» бёлюмлеринде къуллукъ эте, аскер борчларын толтура, Энчи аскер операцияны кезиуюнде жан берген аскерчиле Аслан Кештовну, Къудайланы Радмирни, Ренат Калажоковну эм Альберт Геховну хурметлерине жораланнган республикалы эришиу ётгенди. 

Спортну бу тюрлюсюнден Къабарты-Малкъарны биринчилигине къатышханланы къауумунда «Эльбрус» клубну келечилери да бардыла. Тренерле Жантуудуланы Азаматда бла Жаникаланы Асланда жарау этген 14 спортчу кеси жыл санлары эм ауурлукъ къауумларында майдалла къытхандыла. Аладан жетеулен Тебердиланы Магомед, Бёзюланы Исмайыл, Кючмезланы Айдар, Нёгерланы Алихан, Мендекеланы Имран, Эндрейланы Мухаммат, Отарланы Алан бла Алихан «алтынла» къытхандыла.

Дагъыда финал сермешлеге жетип, кюмюш майдалла къоллу болгъанланы араларында Бичиланы Къурман бла Бёзюланы Алихан бардыла.

«Доммакъланы» ычхындырмай, саугъалы жерлеге чыкъгъанла уа Гочаланы Темирлан бла Кязим, Балаланы Рахим, Жангоразланы Амир, Уяналаны Омар эм Темуккуланы Ибрагимди.

Бу эришиуледе биринчи эм экинчи жерлени алгъанла уа Россейни спортну бу тюрлюсюнден бардырыллыкъ биринчилигине къатышыргъа эркинлик алгъандыла.

Къасымланы Аминат.
Поделиться: