Болушлукъну терк тапдырыргъа хазырдыла

Къышда Къабарты-Малкъарда солургъа сюйгенле аслам боладыла. Мында туристлеге жолоучулукълагъа 57 сейир маршрут барды, ала  къыйынлыкъларына кёре алты къауумгъа юлешинедиле, битеулю узунлукълары уа 1,4 минг километрге жетеди. Алада  къоркъуусузлукъну жалчытыу, ачыгъанлагъа терк болушлукъ этиу бла уа къутхарыучула кюрешедиле. Ала Уллу Кавказ таулада  – бешминглик сегиз таудан жетисинде ишлейдиле, кюн сайын хазырлыкъда турадыла.

Къутхарыучула дайым усталыкъларын ёсдюредиле, сынам жыядыла. Бу жол а аланы юйрениулери Минги тауну къыбыла этегинде ётгендиле. Ала чыран бла ёрге 4600 метрге чыкъгъандыла, учхалауукъда аллай бийикликде ишлеген тынч тюйюлдю, бузда жангызда темирден энчи чурукъла бла барыргъа боллукъду. Буз терк сыннганы ючюн, аны бек сакъ ууатыргъа керекди.

-Къыйын болумлада ишлеу къутхарыучуладан терк эм тюз амал таба билиуню, бийик усталыкълы эм кесини жанына къоркъуу чыкъгъанда да башхалагъа болушургъа  хазыр болууну излейди. Быллай юйрениуле  аланы бу жаны бла сынамларын ёсдюрюр мурат бла бардырыладыла, -дегенди МЧС-ни Элбрус бийик тау излеу-къутхарыу отрядыны башчысы Гюлюйланы Абдуллах.

Кульчаланы Зульфия.
Поделиться: