Урлукъну качествосун тинтедиле

Жаз башында урлукъ себиуге жер-жерледе мюлкле тири хазырланнган кезиудю шёндю. Алада техникагъа къарайдыла, ремонт ишлени бардырадыла, керек затладан, ол санда отлукъдан, семиртгичледен, урлукъладан да къыстырыкъ этедиле. Ала бары да магъаналыдыла, алай дагъыда эм башына урлукъну, аны качествосун салыргъа керек болур. Ол себепден, ишле башланырны аллында аны тинтмей къоймайдыла.

Шёндю бу жумушну районланы кёбюсюнде бардырадыла. «Россельхозара» къырал учрежденияланы бёлюмлерини специалистлери урлукъну ёсюмлюгюн, тазалыгъын, мылылыгъын тинтедиле, юслеринде неда ичлеринде заранлы затлары бар эселе да къарайдыла. Май районда бёлюмню агрономлары Ерохина Е. эм Шульга А. жазлыкъланы 269 тонна урлукъларын тинтип чыкъгъандыла. Ол санда арпа, будай, къудору, чёплеу да бар эди. Ары дери уа кюзлюклени урлукъларына кёз жетдиргендиле.

Терк районда бёлюмню баш агроному Шикляшева В. уа «Элеватор» предприятияда жарашдырылгъан гибрид нартюхню 1362 тонна чакълы урлугъун тинтгенди, бары да къырал излемлеге келишгенин тохташдыргъанды.

Ведомствода айтханларына кёре, бизни республикада чыгъарылгъан нартюх урлукъ Россейни кёп регионларында, талай тыш къыралда да иги сатылады. Аны качествосуна бир жерден да тарыгъыу келмегенди.

Улбашланы Мурат хазырлагъанды.