«Жыр мени дуниямды»

Бюгюннгю ушакъ нёгерим къарачай-малкъар халкъны фахмулу жырчыларындан бири Катчиланы Робертди. Жаш жырчыны чыгъармачылыгъын сюймеген, аны ауазын башхаладан айыра билмеген хазна адам табылыр миллетибизде. Бизден сора да, аны орус тилде жырлары башха халкъланы жюреклерине да жол тапхандыла дерге боллукъма. Аны алайлыгъына социал сетьледе жырчыны клиплерини бла видеоларыны тюплеринде билдириуле шагъатлыкъ этедиле. Фахмулу жашны Нальчикге терк-терк да чакъырадыла. Миллет концертлени асламысы аны къатышыуу бла ётедиле. Озгъан жылны ахырында уа ол Андрей Малаховну «Жюрекден жырла» деген бериуюне да чакъырылгъан эди.

 Кёп болмай а Роберт, аламат ауазлы  Алботланы Марьяна бла бирге, Нальчикде болуп, «Ашханада» миллет азыкъларыбызны жарашдырыуда усталыкъларын да кёргюзтгенди.  Бериуню съёмкалары башланырдан алгъа биз, Катчи улу бла ушакъ бардырып, ол жырчылыкъгъа къалай бла келгенин билгенбиз.

- Роберт, сахнагъа къалай бла келгенинги юсюнден айтсанг эди.

- Жырлап башлагъынчы мен «Къарча» деген ансамбльде тепсеп тургъанма. Артда андан кетип, бир кезиуден а кесими жыр искусствода сынаргъа сюйюп, Ёзденланы Альбертни бла Тамбийланы Къаспотну чыгъармаларын айтып башлайма. Ол бир 10 жыл алгъа эди. Аланы жырларында Ата журтха, адамгъа сюймеклик кенг ачыкъланнганын бек жаратыучум эсимдеди.

- Кесинг а макъам, назму уа жазыучумуса?

- Угъай, аллай фахмум жокъду. Жарсыугъа, ноталаны окъуна билмейме. Жюрекден келгенича жырлайма. Ол жумушланы уа бу ишлеге усталыкълары болгъанлагъа ышанса игиди деп, оюмум алайды. Хар адам да билгени бла кюрешсе керекди.

 - Сен жаш адамса алыкъын. Бу ыз бла билим алыргъа сюймеймисе?

 - Къалай эсе да, аны юсюнден сагъыш да этмегенме. Музыка билимим болмагъаны манга артыкъ чырмау чыгъармайды.

 -Усталыгъынга кёре уа кимсе?

- Мен психологма. Кесибизде Черкесскде университетни бошагъанма.

   - Алгъаракъда чыкъгъан сени орус тилде «Под балконом», «Я тебя теряю», «Неверная»деген жырларынг жаланда кеси миллетибизни ичинде угъай да, башха хоншу регионлада да кенг жайылып, жюреклеге жол тапхандыла. Аланы ким жазгъанды?

- Жырланы тенгим Биджиланы Азамат жазгъанды. Орус тилде айтхан жырларымы асламысыны авторлары олду.

- Юйюрюгюзде санга дери жырлагъан, музыка бла кюрешген болгъанмыды?

- Атам гитарада согъады. Андан мен да юйреннген эдим.

-Бир къауум жыл алгъа сиз къобузчу Катчиланы Руслан бла дуэтде ата-анагъа жораланнган жыр айтхан эдигиз. Сен къобуз бла жырларгъамы огъесе инструментал музыка бламы сюесе асламында?

- Ол жыргъа кёреди. Бир-бир жырлагъа аллай кёп инструментли музыка келишмейди. Хар зат да чыгъарманы энчилиги бла ёнчеленеди. Сёз ючюн, къобуздан башха музыка керек болмагъан жырларыбыз кёпдюле. Магъаналарына кёре, алагъа бир тюрлю къошакъ керекмейди. Бузуп къояргъа къоркъуу барды.

- Жырдан бош заманынгы уа къалай ётдюрюучюсе?

- Жырлап ётдюрюучюме…Кесими студиям барды да, заманымы асламында анда ётдюреме. Эсиме бир зат келсе, аны эбине жетдиргинчи андан чыкъгъан да этмей кюрешиучюме.

- Назму тизгинле жазмайма дединг. Окъургъа уа сюемисе назмуланы?

- Асламында, жыр къурар муратлы къараучума алагъа. Аллын жаратсам, андан арысы да тюз ол халли барады. Алай бир-бирлеча сагъатла бла поэзиягъа дуниясына батыб а туралмайма.

- Бюгюн сен «Ашхана» деген береуге къатышыргъа келип тураса. Аш-суу этерге къалайды фахмунг? Не зат жарашдырлыкъса проектде?

- Бу жумуш да, жырча, жюрекден келирге керекди. Мен этни сюеме да, аны жарашдырып кёрлюкме.

- Сен социал сетьлеге энчи магъана беремисе? Тынгылаучуларынгы асламы къайдандыла?

- Угъай, артыкъ уллу магъана бермейме. Алай башхалача, хайырланнган да этеме, бир тюрлю жангы жырым болса, аны тынгылаучулагъа эшитдирирге сюйюучюме.

- Бюгюнлюкде ненча жырынг барды репертуарынгда?

 - Кеси тилибизде бла орусча 100-ден артыкъ жырым барды. Аланы арт 7 жылда жарашдыргъанма.

  - Къадар болуп, бу ызны сайлагъанынга ыразымыса?

 - Хау, алай жыр кеси сайлагъанды мени деп, оюмум алайды.

-  Сау бол. Жангы жырларынгы сакълайбыз.

Ушакъны Таппасханланы Аминат бардыргъанды.
Поделиться: