Сугъарылгъан жерлеге къошулады

Къабарты-Малкъарда«Агропромышленный комплексни продукциясыны экспорту» федерал проектге эм «Россейни мелиорация комплексин айнытыу»  ведомстволу программаны хайыры бла эл мюлкге бёлюннген жерлени алты мингинден артыгъында  сугъарылырча мадар этилгенди. Къыйматлы ишни бардырыугъа Басхан районда да аслам эс бурулады. Ол санда беш жылны ичинде жерчиликде уруннганланы кючю бла 2,7 минг гектарда быллай мадар этилгенди. Аны чеклеринде бюгюнлюкде  мюлкледе   жауун халда сугъаргъан 31 машина ишлейди.

Бюгюнлюкде мелиорацияны   агропромышленный  комплексни айнытыугъа уллу болушлугъу барды.  Аны кенг  хайырланыу тюрлю-тюрлю ёсюмлюкледен бай тирлик алыргъа эмда иги кесек  файда тюшюрюрге  себеплик этеди. Сёз ючюн,  Басхан районда 2019-2023 жыллада мирзеуден -32 процентге, чеплеуден -  2,6, картофдан –  2,2 , тахта кёгетледен, жемишледен эм наныкъладан  – 2 кереге кёп алыргъа онг табылгъанды.

Арт жыллада сабанлыкълагъа артыкъ къошулмагъаны себепли, мюлклени  иелери бай тирлик алырча,   жерлеринде жангы технологияланы тири хайырланыргъа итинедиле.  Орта эсеп бла алып айтханда, былтыр бир гектардан мирзеуден бла къудору битимледен – 69 эм тахта кёгетледен да 200 центнер алыннганды. Ол, буруннгу жыл бла тенглешдиргенде, эки къауумда да  12 эм 49 процентге  кёпдю.