Танг кесек проект кёргюзтюлгенди

Кёп болмай Россейде илмуну кюнюне  жоралап  Къабарты-Малкъар къырал университетде  Шимал-Кавказны жаш алимлерини проектлерини онсегизинчи  кёрмючю болгъанды.

Бу жол анга Къабарты-Малкъардан, Ставрополь крайдан, Ингушетиядан, Юг Осетиядан эм Дондагъы  Ростовдан   130-дан аслам   жаш алим къатышханды, ол санда студентле  аспирантла, школчула эм башхала.    Саулай алып айтханда, алтмыш ишден артыгъы КъМКъУ-ну алимлерине жетгенди.

Даражалы форумгъа чакъырылгъан  къонакъланы санында КъМР-ни Парламентини билим бериу, илму эм жаш тёлюню ишлери жаны бла комитетини председатели  Нина Емузова,  жарыкъландырыу эмда илму министр Анзор Езаов, жаш тёлюню ишлери жаны бла министрни орунбасары Ахметланы Артур, бийк-тау  геофизика  институтну таматасы Беккиланы Мухтар,  «Опора России» жамауат организацияны  бёлюмюню башчысы  Альберт Кильчуков эм башхала болгъандыла.

Кёрмючню ача, КъМКъУ-ну ректоруну къуллугъун толтургъан Юрий Альтудов быллай магъаналы ишни  ётдюрюрге онг табылгъанын, анга иги кесек адам къатышханын да къууанчлы шартха санагъанды. Жаш алимлени устазларыны арасында ол кеси окъутханла да болгъанын, дайым алимлени тизмеси жашнай баргъанын  чертгенди. Аны бла бирге баш борчладан бирине жангы технологияланы айнытыуну эм къыйматлы проектлени  къыралны экономикасына сингдириуню  санагъанды. Къыйматлы проектлеге бизнесменле да эс бурурларына ышаннганын къошханды.

Анзор Езаов  школчуланы проектлерине артыкъ эс бургъанын эм ала энчи ыспасха тийишлиликлерин, ала тамблагъы кюнде  республиканы эм къыралны да илмусун айнытырыкъла болгъанларын   эсге салгъанды.   

 Ахметланы Артур да, айтылгъан сёзлеге къошула,  жаш адамланы  тирирек болургъа эм   тутхан ишлеринде жетишимле болдурургъа итинирлерин  чакъыргъанды.

- Бу жол бек кёп сейир ишни кёрюрге онг чыкъгъанды. Жыл сайын кёрмючге къатышханланы  саны ёсе барады. Аны бла бирге бюгюнлюкде отуздан артыкъ проект жашауда бардырыладыла.  Быллай  ишни магъанасы жамауатха эм бизнесменлеге да жаш алимлени  ишлери бла шагъырей этерге, экономикагъа  жангы технологияланы сингдирирге эм файда келтирирча этергеди. Мында да иги  кесек проект  эсленирине бек ышанма, - дегенди КъМКъУ-ну илму-излем  жаны бла проректоруну къуллугъун толтургъан  Светлана Хаширова.

Кёрмючде жаш алимлени  проектлери  эл мюлк, медицина, къурулуш, промышленность, робототехника  эм башха бёлюмле бла  байламлы болгъандыла.

Ахырында  «Эм иги  инновациялы проект», «Эм иги  инновациялы продукт», «Эм иги  инновациялы акъыл», «Эм иги проектни  презентациясы», «Эм иги бизнес-оюм», «Эм иги  социал проект» номинациялада хорлагъанланы белгилерча эсепле чыгъарылгъандыла. 

 Биринчи жерлеге чыкъгъанла дипломла бла бирге  35-мингишер сомгъа тийишли болгъандыла. Аны бла бирге КъМКъУ-ну  технология бла жангычылыкъла жаны бла арасы проектлерин жарашдырыргъа эм бардырыргъа болушурукъду.