Байламлыкъланы кючлер муратлыдыла

Къабарты-Малкъарны экономиканы айнытыу министри Рахайланы Борис «Почта Банкны» Шимал Кавказда бёлюмюню башчысы Анатолий Лопырин эмда республикада бёлюмюню таматасы Резуан Мамбетов бла тюбешгенди. Ала бу финанс учрежденияны былтыргъы ишини эсеплерини эмда мындан арысында жюрютюллюк байламлыкъланы юсюнден сёлешгендиле, деп билдиргендиле министерствону пресс-службасындан.

Къонакъла айтханларына кёре, Къабарты-Малкъарда бу банкны шёндю 89 шахарда бла элде 151 бёлюмю ишлейди. Мында аны жумушларын битеуда 26 мингден артыкъ инсан хайырланады. Банк «Госуслуги», «Цифралы профиль», Бирикген биометрика система, «Пушкинни картасы» къырал проектлеге тири къатышады, иш хакъланы эмда пенсияланы тёлеу программаларын да къыйматлы бардырады.

Былтыр декабрьде «Россей» халкъла аралы кёрмюч-форумда КъМР-ни Башчысы Казбек Коков бла «Почта Банкны» таматасы Александр Пахомов тюбешген эдиле. Ала арада байламлыкъла жюрютюрге оноулашхандыла эмда республикада шёндюгю банк технологияланы бла инфраструктураны айнытыу жаны бла «жол картагъа» къол салгъандыла. Аны хайырындан пенсиячылагъа, башха льгота къауумлагъа киргенлеге да, гитче элледе окъуна финанс жумушланы женгилирек хайырланырча боллукъду, аланы качествосу да игиленирикди.

Алай бла Рахайланы Борис да Банк бла мындан арысында бирге ишлерге келишгендиле. Бу финанс учрежденияны келечилери жууукъ кезиуде МФЦ-ны башчылары бла тюбеширикдиле.