Магъаналы эришиуле

Бу кюнледе Элбрус районну сабий эм жаш тёлю чыгъармачылыкъны айнытыу Мокъаланы Магомет атлы арасында «Техноградха жолоучулукъ» деген конкурсну кезиулую байрамы ётгенди. Анга, тёредеча, бери жюрюген окъуучуланы ата-аналары, Тырныаууз шахарны билим бериу учрежденияларыны устазлары да къатышхандыла. Бу жол 5-чи номерли гимназияны устазлары Анжела Шекунцова, Лидия Самаковская, Ольга Шомахова  айырмалы болгъандыла. Конкурсну къурагъан араны педагогу Бишенов Руслан Халифович бу жумушха, хар жылдача, жууаплы хазырланнганды. Эришиуню мураты, араны чыгъармачылыкъ ишин жангыртыуда тюрлю-тюрлю амалланы кенг хайырланып, бу ызны сабийлеге бла аланы ата-аналарына сейирли болдурууду.

Арада ишлеген хар биригиу бу кюннге деп, кеслерини усталыкъларына кёре станцияла къурагъандыла. «Сейирни жаратабыз», «Къонакъ юй», «Бармакъчыкъларынгы жаларса», «Технопарк», «Саулукъ сакълау», «Матрица», «Арт-Дизайн»  деген бусагъатдагъы жашауда жюрюген эм кёп хайырланнган атла атагъан эдиле. Эришиуге къатышханла да «Хунерли къолла», «Киви», «Десерт», «Медикле», «Фортуна», «Intel и Ko», «Старт» деген къауумлагъа юлешинип, байрамны бютюн аламат этгендиле.

Къауумла кезиу-кезиу станциялагъа жюрюгендиле. Анда уа биригиуню педагогу алагъа чыгъармачылыкъ эм сынау ишле берип, аланы толтургъанларына кёре белгиле салгъанды. Сёз ючюн, аш-азыкъ биширирге юйретген биригиу бир татлы аш хазырларча иш бергенди. Тигиу этерге юйретген биригиу а хуржун жарашдырып, тигерге, анга тюйме да салыргъа кереклисин билдиргенди. Анга кёре хар биригиуню кесини энчи иши болгъанды. 

Къауумла берилген сагъат марданы ичинде жумушланы толу тындырыргъа керек эдиле. Эришиуню бютюнда сейир этген а жаш тёлюню къармашыуу, хорларгъа итиниую болгъанды. Бу кюн ата-анала да сабийликлерине къайтханча эдиле эдиле десек, ётюрюк болмаз. Алай бла ата-анала, устазла эм къонакъла да араны бёлюмлерини иши бла толу шагъырей болалгъандыла. Сабийле бу арада не бла кюрешгенлерин, аланы сейирлерин, фахмуларын да кёралгъандыла.

  Руслан Халифович бу эришиуню къурап бардыргъанлы бир ненча жыл болады. Бу оюм анга къалай келгенини юсюнден кёп Битеуроссей эришиуледе биринчи жерлеге тийишли болгъан, сынамлы, сабийлени жюреклерине ариу жол таба билген устаз былай айтханды:

- Быллай тюрлю ишле, эришиуле сабийле бла аланы ата-аналарыны араларында байламлыкъны кючлендиредиле. Аны себепли проектлерибизни жылдан-жылгъа  жангырта, кенгерте барабыз. Кемчиликлерин эслей, аланы тюзете, бюгюннгю халына келтиралгъанбыз. Бу оюм бла арабызны таматасы Мисирланы Фарида келгенде, сау болсунла, методистле бла бирликде мени кёллендирип, билеклик этгендиле. Андан бери аны беш жылны ичинде окъуучуланы араларында бардырабыз. Озгъан жылда бла быйыл а бу ишге ата-аналаны да къатышдырыргъа  тийишли кёргенбиз.

Эришиуню жаланда жаз башында бла къышда угъай, жайда да бардырсакъ, битеу къошакъ билим бериу биригиулерибизни фахмуларын  кёргюзтюр амаллары боллукъду. Мекямыбызны арбазында чатырла салыргъа юйретиу, от тиргизиу,  жашау амалла болмагъан жерде къалай кечине билирге кереклисине да юйреталлыкъбыз. Ракета макетлени хауада учуруу да сейирди сабийлеге. Айтханымча, арабызны устазлары, сау болсунла, хар жылдан тириден-тири къатышып, станцияларыны ишлерин айырмалы къурайдыла.

Айта келгенибизча, окъуучуланы бла ата-аналаны араларында быллай эришиулени къаллай магъаналары болгъаныны юсюнден араны таматасыны билим бериу жаны бла орунбасары Ёзденланы Анжела айтады:

 Арада кёп ахшы ишле бардырыладыла. Кертисин айтханда, хар ыйыкъдан бир тюрлю-тюрлю ишле къурап, сабийлени сейирлерин къозгъаргъа кюрешебиз. «Техноградха жолоучулукъ» деген эришиу да аладан бириди. Бюгюннгю кюнню къалай ётгенин, заманны къалай кетгенин эслемегенбиз. Аллай бирге сейир, фахмулу къуралгъанды бу конкурс. Анга къатышхан устазла бла къонакъла кеслерини ишлеринде хайырланырча аламат дерс алгъанларын энчи чертгендиле. Ала: «Сабийлерибиз бу араны тюрлю-тюрлю биригиулерине жюрюгенлерин биле эдик. Алай, аланы къаллай магъаналы затлагъа юйренир онглары болгъанын а бюгюн кёрдюк», - деп, къууанып кетгендиле. Биз сынам халда былтыр районубузну Билим бериу управлениясыны келечилерин да къатышдыргъан эдик. Быйыл а – гимназияны устазларын. Келир жыллада да къонакъларыбызны саны кёбейиригине ишексизбиз.

Эришиуню ахырында хар къауум алгъан балларына кёре жерлеге тийишли болгъандыла, ала махтау къагъытла бла саугъаланнгандыла. Жыйылгъанла уа, ыразылыкъларын билдире, араны иши мындан ары да жетишимли болурун тежегендиле.