От ёчюлтюу гидрантланы талайында – бузукълукъла

Россейни МЧС-ни регионда Баш управлениясындан билдиргенлерине кёре, озгъан жылны ахырында от тюшгенде хайырланылгъан эшикдеги суу быргъыланы халларына къаралгъанды. Бу ишге ведомствону бёлюмлерини, жер-жерли самоуправление  органланы, суу быргъыланы тап халда тутаргъа жууаплы организацияланы келечилери къатышхандыла.

Эсеплеге кёре бюгюнлюкде республикада от тюшгенни ёчюлтюрча суу чыкъгъан 3340 жер барды, аладан 2459 гидрантладыла, 711 кёлледиле, 170 уа суу жыйылгъан бийик къалаладыла. 2023 жылны ичинде жангы 100 гидрант ишленнгенди, 36-сына уа ремонт этилгенди. Болсада, этилген мадарлагъа къарамай, республиканы кёп жерлеринде къыйын болумда сууну тапдырыу тийишлисича къуралмагъанды. Болгъан 2459 гидрантдан 585-синде, 711 кёлден да 186-сы бузукълукъла бардыла. 170 суу жыйылгъан къаладан от ёчюлтюу-къутхарыу техника сууну алалырча оборудование бла жангызда 33-сю жалчытылыныпды. Табийгъат черекледе бла кёлледе, суу жыйылырча адамла ишлеген жерледе да къутхарыу техниканы салырча, жылны къайсы кезиуюнде да жагъагъа ёталырча къаты 12х12 метрден аз болмагъан майданла жокъдула.

Эсигизге салайыкъ, от ёчютгенде суу бла жалчытыуну магъанасы уллуду. Отну ёчюлтюрге энчи бир заман болуучуду. Ол болжаны ичинде иги келген суу керекди, ансыз къыйын болумну хатасы ёсерикди, аны зараны адамлагъа, мюлклеге, жаныуарлагъа да тиерикди.

Кульчаланы Зульфия.
Поделиться: