Учрежденияланы жангыртыугъа – аслам эс

2 февраля, 2024 - 10:50

Къабарты-Малкъарда 2030 жылны ахырына   отуз чакълы медицина  организация ишленирикди. Аны бла бирге  «Саулукъ сакълау» миллет проектге эм «Саулукъ сакълауну биринчи звеносун жангыртыу» программагъа кёре, 2025 жылны ахырына дери 38 стационаргъа тынгылы ремонт этилликди эм 15-си да  жангы ишленирикдиле.   

Жарсыугъа, сагъынылгъан программаны чеклеринде республикада бу жаны бла чурумну кетерирча   болмагъанды. Ол себепден аны энтта да беш жылгъа созаргъа келишгендиле. 

КъМР-ни саулукъ сакълау министри   Рустам Калибатов айтханнга кёре,  ишлени кезиуюнде 26 объектге тынгылы ремонт этилликди эм 27-ни къурулушу башланырыкъды.  Саулай алып айтханда, проектни толтурурча 7,3 миллиард сом къоратыллылкъды.    

Министр адрес халда  инвестиция  программа бла онкология диспансер ишлениригин да билдиргенди. Келир заманда уа   башха объектлеге да  къараллыгъын, сёз ючюн, психоневрология, туберкулездан бакъгъан диспансерле эм  жукъгъан ауруулагъа къажау турурча  больница ишениригин да къошханды.

Курданланы Сулейман.
  • 13 просмотров
Поделиться: