Къоркъуусузлукъ инсанны кесини къолундады

Электричество  инсанны жашауунда эм керекли онгладан бириди. Алай аны  хайырланнганда эссизлик этиу къыйын болумгъа да келтиреди. Юлгюге, бу кюнледе Зольск районда жашау  юйню котельнясына от тюшгенди. Насыпха, ол ал кезиуледе ёчюлтюлюп, хата келтирмегенди. Дознанияны бардыргъанда, эски ток ызлада бузукълукъ болгъаны ачыкъланнганды.

МЧС-ни регионда Баш управлениясында келтирген эсеплеге кёре, къыйын болумлагъа келтирген чурумланы арасында экинчи жерде электрооборудованияны, ток  ызланы хайырланыуну жорукъларына бузукълукъ этиу алады. Дагъыда бир сылтау - эски ызла алышынмагъанлай, ток бла ишлеген электроприборланы тапсыз  хайырланыуду.

Бу болум бла байламлы МЧС былай эсгертеди:

- эски неда бузукълукълары болгъан ток ызла бла хайырланмагъыз;

- ток бла  жылытыучуланы салгъанда сакъ болугъуз;

- жандырылгъан электроприборну къараусуз къоймагъыз, сабийле да аны кеслери алларына токга салмасынла;

- кеслери ёчюлтюлген приборла салыгъыз;

- бир ток  ызгъа асыры кёп прибор къошмагъыз.

Бу жорукъланы эсде тутуу от тюшюуден сакъланыргъа болушурукъду, къоркъуусузлукъ, эм алгъа, адамланы кеслерини къолларындады, жууаплылыкъларындады.

Кульчаланы Зульфия.
Поделиться: