Айырмалыла Москвагъа барлыкъдыла

Бу кюнледе Нальчикде Кёп функциялы жаш тёлю арада «Россейни студент къауумлары» деген организацияны регион бёлюмюню келечилерини жыйылыуу ётгенди, деп билдиреди Араны медиа проектлери эм  муниципал  къуралыулада жаш тёлю бла ишлеу жаны бла баш специалисти Атмырзаланы Аминат.

Тюбешиуге КъМР-ни Жаш тёлюню ишлери жаны бла министри Азамат Люев эм «Россейни студент къауумлары» деген организацияны регион бёлюмюню таматасы Мурат Кайцуков къатышхандыла.

КъМР-ни Жаш тёлю арасы бюгюнлюкде студентле урунуу ишлеге тири къатышырча этиу жумушха эм аланы Россейни студент къауумларыны санына къошулурча сейирлери болуруна энчи эс бёледи.

«Россейни студент къауумлары» деген организация окъуудан бош заманлары болгъан кезиуде ишлеп, сынамлыла болургъа сюйген студентлени бирикдиреди. Жаш адамланы официал халда ишге тохташыуларына себеплик этген организацияды ол.

Алай бла, тюбешиуню кезиуюнде регионде бёлюмню ишин хайырлы къурау жаны бла жангы амалланы сюзгендиле. Ары кёп жангы жаш адам да келгени себепли, къымылдауну ишини юсюнден къысха видеоролик кёргюзтюлгенди.

Министр Азамат Люев а, организацияны ишине тири къатышып, кесин иги жаны бла кёргюзтген жаш адамланы уа, КъМР-ни Башчысыны болушлугъу бла,студент отрядланы 65-жыллыгъына эм  «Россейни студент къауумлары» деген организацияны 20-жыллыгъына аталып Москвада ётерик съездлеге къатышыр онглары боллугъун билдиргенди.

- Не иги, не жетишимли да болугъуз. Биз а билеклик этерге хазырбыз, - деп чертгенди министр.

Ызы бла къонакъланы «Свободные алмазы» деген педагогикалы отрядны келечилери Милана Абидова бла Дмитрий Косинов а россейли студентле бек жаратхан жырладан къуралгъан тизмеде биринчи жерде орналгъан «Снова в отряд» деген жыр бла кёллерин кётюргендиле. 

Тюбешиуде дагъыда юслеринде тюрлю-тюрлю студент чакъырыула жазылгъан суратладан, хуржунладан, кружкаладан къуралгъан кёрмюч да бар эди. Аланы «Альтруистле» отрядны келечиси, фахмулу къыз Раяна Кодзокова тамамлагъанды.