Дарманланы не бла ичерге жарайды

Бюгюнлюкде аптекалада сатылгъан дарманланы ёлчемлери алгъын (20-30 жыл мындан алгъа) заманла бла тенглешдиргенде иги да асламдыла. Ол къадар дарманны жангылмай, адамны саулугъуна заран келтирмей къалай хайырланыргъа боллугъуну юсюнден ара медицина басмада жазылгъан билдириулени басмалайбыз.

Биринчиден дарманны не зат бла ичерге жарамагъанын эсигизге салайыкъ - чай, кофе, жемиш суу, сыра, чагъыр. Аллай суусун ичгиле дарманла бла шуёхлукъ жюрютмейдиле. Дагъыда бир затны эсигизде тутугъуз, «терс» суусун затла дарман таблеткаланы кючлерин азайтыргъа неда кёбейтирге боллукъдула, къоркъуулу чекге окъуна жетдирирге. Тюбюнде айтылгъанла да аланы санындадыла.

Грейпфрутну сууу. Канаданы Лоусон шахарда саулукъ сакълау институтуну тинтиу ишлени бардыргъан специалистлери цитрус жемишледе, артыкъда грейпфрутда фуранокумаринле - дарманланы кючлерин кёп кере кёбейтирик затла - болгъанын тохташдыргъандыла. Артыкъда грейпфрут къоркъуулу тюйюлдю.

Азыкъ да дарманланы кючлерин азайтыргъа боллукъду. Медикле ашарыкъланы былай хайырланыгъыз, дейдиле. Тетрациклин къауумну дарманларын хумужу, бурчакъла эм бишлакъ бла;

темирли дарманланы чертлеуюкле бла;

тромблагъа къажау дарманланы шпинат эм хобуста бла;

антибиотиклени - жемишле эм уксус къошулгъан аш бла;

аспиринни - цитрус жемишле аны жюрек дарманла бла, аллергиягъа, вируслагъа, гипертониягъа, антидепрессантлагъа къажау хайырланыучу дарманла бла бирге ашасагъыз келиширикди.

Чай. Мында танин барды - дарманланы адамны чархына терк сингдириучю зат. Ол бир-бирде адамны чархын чекден озуп тирилтеди, бир-бирде уа дарманланы кючлерин азайтады. Жюрек ауруугъа жарагъан таблеткаланы эм аш оруннга къажау дарманланы да чай бла ичерге керек тюйюлдю.

Кофе. Ол санны тирилтеди. Дарманны кофе бла ичсегиз, ол аны адамны санындан терк чыгъарлыкъды неда аны хайырын кючлерикди (аурууну шошайтырыкъ дарманны аны бла ичсегиз да алай боллукъду).

Сют. Бир-бирде дарманланы, сёз ючюн, калийли эм витаминлени сют бла ичигиз, деп окъуна айтадыла. Тетрациклин къауумлу антибиотикле эм жюрек дарманла сют бла шуёхлукъну сюерик тюйюлдюле.

Ичги. Аны адамны чархына терк неда акъырын сингнгенин билир ючюн, алимле иничке жалгъан чеги къурашдыргъандыла. Сынаулада ичги бла бирге хайырланылгъан дарманланы 60 процент чакълысы алгъындан эсе терк эригенди. «Бу ишде» артыкъда сакъ болургъа керекди антидепрессантланы, антибиотиклени, анальгетиклени эм къызыулукъну азайтыучу дарманланы ичгенде. Къоркъуусуз парацетамол окъуна бауургъа заранлы боллукъду спиртли ичгини ичсегиз.

Нарзан суу. Газы болгъан татлы суу, хайырсыз болгъандан сора да, аш орунну шытылы жерлерин къыйнайды, алай бла аш орунну кёпдюреди, ётдюреди. Дарманланы аны бла ичсегиз, ол аш оруннга эм чегилеге «бомбады». Артыкъда аш-азыкъны эритиучю, адамны ичин тазалаучу дарманланы эм антибиотиклени аны бла ичсегиз.

Компотла эм кисельле. Врачла гастритден ауругъан пациентлерине эм аш орунларында жаралары болгъанлагъа кисель ичигиз дерге боллукъдула. Ол аш орунну къабыргъаларына жагъылып, дарманланы ачылыкъларын азайтырыкъды, аны бла бирге дарманланы хайырлыкъларын да аз этерикди, аны эсге алыгъыз. Дарман таблеткаланы сют бла ичерге керек тюйюлдю. Компот бла ичсегиз да, жемиш кислота дарманны кючюн тюрлендирликди, ол санда изжогагъа эм гипертониягъа къажау дарманланы да.

Муну да билигиз. Бек иги суусап - юйню ичини температурасы болгъан къайнатылгъан неда шешалагъа къуюлуп сатылгъан, газы болмагъан сууду. Бир таблетканы стаканны жарымындан аз болмагъан суу бла ичигиз.

Поделиться: