Хыйныны кючю

Ахыры. Аллы 30 январьда басмаланады.

Бир кюн Къайсынны кесине къонакъгъа ишчи нёгери чакъырады. Ары ала Саният бла тебирейдиле. Ол баш иеси бек сюйген къара жыйрыгъын киеди. Сора эшикден тышына чыгъаргъа тебирегенлеринде, босагъа аллында хантус тёгюлюп тургъанын кёредиле. Ала экиси да сейирге къаладыла, алай артыкъ уллу эс бёлмей, юсю бла атлап кетедиле. Къууанчлы жыйылыуда олтуруп тургъанлай, ол жыйрыгъыны женгини бир жеринден къумачы кесилип алыннганын ангылап,Саният сау ингирни алайын къолу бла жабаргъа кюрешип турду. Ол анга бек сейир кёрюндю. Сагъыш эте кетип, хыйлалыкъны гитче Лейлячыкъ этген сунуп, андан сорду. Алай къызчыкъ тиймегенин айтды.

Жай айлада Саният сабийлерин да алып Кавказагъа кетеди. Ата юйюнде ол эки ай чакълы туруп къайтды. Бир ненча кюнден жашчыгъы Ислам бир сейирлик сёлешип башлагъанын сезди. Алай сабий садда юйретиучюле уа ол алгъынча, тюрлениусюз сёлешгенин айтханларында, ана сейирге къалды. Сора, сюзе кетип, сабий ол халда юйде болгъан кезиуюнде сёлешгенин ангылады. Бир кесекден а аны кесини хали да бир сейирлик болуп, юсю кичип тебиреди.

Ыйыкъны ичинде докторла анга бир жукъ бла да болушалмадыла. Биргесине ишлеген тиширыу Тамара сёлешгенде, Саният юйюрюнде бола тургъан затланы юсюнден айтды.

- Сен айып этме, алай мен сизге хыйны этилген сунама. Кел, мен бир устаны таныйма. Ол болушурукъду, - деди ол. 

Къарыуу тауусулгъан тиширыу къайры барыргъа да хазыр эди. Биргесине эрин да алыргъа керек эди. Къайсын угъай демеди. Юйюрюн да, Тамараны да алып, ол уста жашагъан элге тебиреди. Бир сагъат чакълы барылгъан жол Саниятха ёмюрлюкча кёрюндю. Уста киши алагъа жарыкъ тюбеп, олтуртду. Кёпню кёрген къарт, Саниятдан аны юйюнде болуучу адамланы тизмесин жарашдырырын тиледи. Тизмени ортасына ол Гюльзираны атын да жазды. Анга жетгенлей, устаны санлары къурушуп тебиредиле, терлегени сууча келип, сёзлери аузундан кючден чыгъа, ол:

 - Бу адам жиннге къуллукъ этеди. Къара кючю уллуду. Юйюнге къойма, мындан арысында къойма босагъангдан ары! Ол энтта бир кере хыйны этсе санга, ёллюксе. Мени кючюм анга жетерик тюйюлдю. Аны себепли кесинг сагъыш эт, - деп, уста кючден къарыу ала, шинтикге олтурду. 

Саният эрине тюрслеп къарады. Ол кёзюн кётюрмей, жерге къарап эди. Уста Исламчыкъгъа бла анасына болушурча жумушларын тамамлагъандан сора, ала артха, жолгъа тебиредиле. Тыш адамны къатында сёз да айтмай келген Саният, юйге киргенлей айтырыгъын артха салмады.

- Бизни юйге ол тиширыуну не бетинг бла келтиргенсе мен мында болмагъанны марлап? Сени хатангдан жашыбыз тилкъау болургъа аздан къалгъанды. Аны хыйнычы болгъанын энтта ангыламагъанмыса? Нечик тели эдим мен Зухра айтханда къулакъ салмай. Сени сабийингден айырыргъа болмай, эркинлик берип. Алай мындан ары быллай жашау манга керекмейди. Сени уа бир  заманда да кечмем.Тамбладан къалмай Кавказгъа кетиуню юсюнден сагъыш этип тебирерикме, - деп, тиширыу айталгъанын айтды.

Сау кечени устаны айтханы аны башындан чыкъмай эди. Бек биринчиден, ол эки сабийини юсюнден сагъыш этгенди. Ол ёлсе, аланы къадарлары къалай къуралыр? Сора неге керекди анга аллай жашау?

Эрттенликде тургъанлай, ол самолётха билетле излеу къайгъыгъа кирди. Къайсын да отоудан кеф халда чыгъып:

 - Бар, къайры бара эсенг да. Сабийлеринги да ала бар, - деген ачы сёзлени айтды.

Сабийлери ючюн жанын берирге хазыр болуучу эринден аллай сёзлени эшитиу анга бек къыйын эди. Алай, ол ангылай эди хыйныны кючю уллу болгъанын…

Къайсыннга кетерик кюнюн окъуна билдиртмей, жаланда сабийлерини кийимлерин эм кесини эки жыйрыгъын чемоданнга атып, Саният Алма-Атаны аэропорту таба тебиреди. Самолётха минерден алгъа, ол эрини кафедрасына сёлешип, юйлеринден ачхычла къоншуларында болгъанларын анга билдирирлерин тилеп, телефон трубканы такъды…

Андан сора ала бир заманда да тюбешмегендиле. Къайсын ючюнчю кере да юйюрлю болгъан эди. Дуниясын алышханлы он жыл ётгенди. Саният а  бюгюн да сауду. Туудукъларына къууана жашайды.