Ангылаулары болгъанланы чакъырадыла

Жангы жыл башланнганлы бери «Лига экскурсоводов» атлы жарыкъландырыу  программагъа къатышыргъа ол жаны бла ангылауу болгъанланы алып тебирегендиле. Аны  мураты усталыкъ  хунерликни айнытыргъа тийишли болумла, эмда сынамлы адамла бла тюбешиулени бардырырча майданны къурауду. Андан тышында да, жаш адамланы жолоучулагъа къайгъырыуну  энчиликлерине тюшюндюрюудю.

Бир къауум урумну кезиуюнде  проектге къатышханла билимлерин ёсдюрюрге, бюгюннгю туристлени излемлерин билирге эмда кеслерини  энчи жол ызларыны (маршрутларыны) юслеринден айтыргъа онг табарыкъдыла. Акъылбалыкъ болгъан жашла бла къызла сайлаулагъа алты  номинацияда къатышыргъа эркиндиле. Алай бла ала «Промышленностьлу экскурсия» «Маданият-саулукъландырыу экскурсия, «Сабийлеге экскурсия», «Волонтёр-экскурсия иш» деген бёлюмлеге тийишлиликде айырыллыкъдыла.

Проектни  «Знание» россейли биригиу эмда «Россия-страна возможностей» президент платформа къурагъандыла. Анга къатышыр ючюн а анкетаны проектни официал сайтында толтурургъа боллукъду. Ызы бла уа усталыкъ бла байламлы тестлени жазаргъа эмда онлайн халда билимин ёсдюрюрге тюшерикди.

Заявкала жыйышдырылып бошагъандан сора уа, хар жерде да къуралгъан энчи комиссияла «Лиганы»  республика даражалы кезиуюнде хорлагъанланы сайларыкъдыла. Аны чеклеринде эришиуге къатышханлагъа 20 мартха  дери жашагъан регионларында кеслери къурагъан экскурсияны бардырыргъа, экспертле бла ушакъгъа къатышыргъа эмда бюгюнлюкде туристлеге не зат тап боллугъу бла оюмларын билдирликдиле, усталыкъларын ёсдюрюрча профильли программагъа тийишлиликде окъургъа онгла бла бирге багъалы саугъала да берилликдиле.

Проектни башлау жаны бла оюм «Маёвка». Больше чем путешествие» деген биринчи турист слётда айтылгъанды. Аны Пятигорскда къурагъандыла эмда анда Знание. Лектор  эришиуде хорлагъанла бла аны ахыр урумуна къатышханла барысы да болгъандыла.