Сейир саугъа

Домбайда «Тарелка» къонакъ юйню билмеген хазна адам болмаз. Алай аны ары къалай бла эм не себепден тюшгенин билгенле уа бюгюнлюкде аздыла.

Аны тарыхы 60-чы жыллагъа кетеди. Ол кезиуде Финляндияны президенти Урхо Коккенен совет къуллукъчуладан бири Алексей Косыгин бла бирге солургъа Алибек ауузгъа келгенди.  Сыйлы къонакълагъа къарачайлыла, тёреде болгъаныча,  аламат тюбеген эдиле. Тыш къыраллы башчы ол жолоучулугъуну юсюнден артда да кёп кере эсгере тургъанды. Домбайгъа саугъагъа кёкде учуучу табакъча затха кёре ишленнген къонакъ юйню да бергенди.

Суратда сиз аны жерине хауа бла къалай тапдырылгъанын кёресиз. Бу сейир мекямны проектин Матти Сууронен жарашдыргъанды. Ол зат аны эсине Юрий Гагарин кёкге учхандан сора келгенди.

Дунияда быллай къонакъ юйлени саны 20-дан аслам тюйюлдю. Къарачай-Черкесден сора да, ала Нидерландлада, Америкада, Грецияда, Германияда эм Финляндияны кесинде да бардыла. «Летающая тарелка» деп анга алай атагъан эдиле. 80-чи жыллада ишленнгенлени бир аз башхаракъдыла.

Шёндю Домбайдагъы къонакъ юйде турууну багъасы 8-12 мингнге жетеди. Анда солургъа сюйгенлени саны къачан да аз болмагъанды. Тыш къыраллы саугъа къоншу республиканы туризм бла байламлы суратларында бла реклама плакатларында хаман да басмаланнганлай турады.

Таппасханланы Аминат.
Поделиться: