Аслам бузукълукъ ачыкъланнганды

Нальчикде жолда жюрюуню жорукълары къалай толтурулгъанларын тинтген кезиуде къырал автоинспекторла 150-ден аслам бузукълукъну ачыкълагъандыла. 

Аны аллында уа Нальчикде УМВД-ны жол-патруль службасыны инспекторларыны эмда РФ-ни МВД-сыны районлада бёлюмлерини ДПС-ини батальонларыны хазырлыкъларына къаралгъанды. Ызы бла ала Нальчикни ара орамларына, жоллагъа эмда шахарны къыйыры  бла баргъан трассалагъа атланнгандыла.

Полициячыла жолда жюрюуню жорукъларына 156 бузукълукъ этилгенин ачыкълагъандыла. Аладан 112-си машинаны миялалары   къаралдым этилгенлери эмда  аллында миялагъа керексиз затла тагъылгъанлары, 14-сю транспортну къырал эсепге салгъанда жорукъла сакъланмагъанлары бла байламлыдыла.

Дагъыда машинаны правалары болмай жюрютгенле, жаяу адамгъа жол бермегенле, къоркъуусузлукъну бауун такъмагъанла, светофорну белгилерине бойсунмагъанла да кёп тюбегендиле. Сабийлени жюрюуде къоркъуусузлукъну излемлерин толтурмагъанла да болгъандыла.  11 водитель а алгъын салыннган административ жууаплылыкъны толтурмагъанлары тохташдырылгъанды (РФ-ни КоАП-ыны 20.25-чи статьясы).

КъМР-де УГИБДД-дан бизге билдиргенлерича, быллай тинтиуле битеу районлада да бардырыллыкъдыла.

Тикаланы Фатима хазырлагъанды.

Право

Низамлы водительлени саулукъларын, жашауларын къоруулаугъа бурулупду  

Машинаны жюрютюрге энчи эркинлиги сыйырылгъанына  да къарамай, жолгъа чыкъгъан водительле кеслерине, тёгерекде адамлагъа да къоркъуу саладыла. Сёзге,  озгъан ыйыкъда КъМР-де жолда жюрюуню инспекторлары энчи рейд бардыргъан кезиуде, 38 водительни тыйгъандыла. Аладан 10-су кеф эдиле,  къалгъанларыны уа машинаны жюрютюрге энчи эркинликлери  болмагъанды  неда, документлери  сыйырылгъанына да къарамай,  жангыдан жолгъа чыкъгъандыла. Тарихлеге кёре, къыралда аварияланы ючден бирин машинаны жюрютюрге эркинлиги болмагъанла этедиле. Ол себепден быллай бузукъчулагъа  жууаплылыкъны къатыландырыу, сёзсюз, магъаналы жумушду.

Сёзге, кеф болуп, жолда тутулгъан водительни машинаны жюрютюрге эркинлиги сыйырылады. Алай инсан жангыдан жолгъа чыгъады, ол терслигин ангыламайды, къаллай аманлыкъгъа да  эркинлиги болгъан сунады.  Болсада законлагъа тийишлиликде, ичгиден неда наркотикден  эсирип, жолда эки эмда андан да кёп кере тутулгъан водитель энди уголовный жууапха тартыллыкъды.     Аны эркинлигин эки жылгъа сыйырыргъа деген жорукъ  кийирилгенди.

 Машинаны жюрютюрге эркинлиги сыйырылып тургъанлай, жангыдан  жолгъа чыгъып,  анда авария этгенлеге  да жууаплылыкъ къатыды: ДТП-да башханы   саулугъуна ауур заран салыннган эсе.  Аллай бузукъчу беш жылгъа борчлу халда хакъсыз ишлеге тартыллыкъды, бир-бир къуллукълада  ишлеяллыкъ тюйюлдю ол  (юч жылны ичинде). Андан сора да, аллай инсанны эркинлиги юч жылдан жети жылгъа дери сыйырылыргъа да боллукъду.

Жолда жюрюуню жорукъларына бузукълукъла этип, билмей, башханы ёлтюрген инсан беш жылдан онеки жылгъа дери тутмакъда тутуллукъду. Эки эм андан да кёп адам жоюлгъан эсе уа,   сегиз-онбеш жылны тутуллугъуна къоркъуу барды. Быллай бузукълукъ этгеннге да бир-бир къуллукълада ишлерге чекле салынадыла.

Жолда жюрюуню жорукъларына бузукълукъла этгени ючюн машинаны жюрютюрге эркинлиги сыйырылгъан инсан, бу оноугъа бойсунмай, биягъа руль артында олтурса, аны    эркинлигин бир жылгъа сыйырыргъа боллукъдула. Аны энтта  къайтаргъан а эки жылын тутмакъда турлугъуна хазыр болсун. Бу кезиуде тазир да салынырыкъды – 150-250 минг сом. Неда инсанны  бир неда эки жылны ичинде файдасы сыйырылыргъа боллукъду, эки жылны ичинде ол бир-бир къуллукълада ишлеяллыкъ тюйюлдю.

Машинаны жюрютюрге эркинлиги сыйырылып, алай бу бузукълукъну жангыдан къайтаргъанлагъа 50-100 минг сом тазир салыргъа эркинди  сюд. Алай бла уа бу бузукълукъ ауур аманлыкъланы тизгинине кийирилгенди. 

 Битеу мадарлагъа, тазирлеге да къарамай,  низамлыкъгъа бойсунургъа ахырда унамагъанланы машиналарын сыйырыргъа деген жорукъну кийириуню юсюнден башламчылыкъ сюзюледи.