Багъыу учрежденияланы жангыртырыкъдыла

Быйыл Чегем районда «Саулукъ сакълау» миллет проектге кёре, саулукъ сакълау учрежденияланы мюлк-техника мурдорларын кючлерча мадар этилликди. Аны баш магъанасы – жамауатха тийишли халда диагностика бардырырча эм багъарча онгла къураргъады.

Комплексли ишлени кезиуюнде тёрт къатлы район аралы больницагъа тынгылы ремонт этилликди. Ол 1980 жылда ишленнгенди, андан бери анга тынгылы къаралмагъанды. Бёлюмлерине женгил ремонт этип къутула тургъандыла.

Бу жол, сюртюу-бояу ишледен сора да, инженер коммуникацияларын, эшиклерин, терезелерин, полун, башында шиферлерин алышырыкъдыла, ич эм тыш къыбыргъаларын сюртюрюкдюле, сакъатла эм башха онгсуз саусузла къыйналмазча пандус эм башха энчи амалла да хайырланыллыкъдыла.

Тынгылы ремонт ишлени келир айда башларыкъдыла. Сагъынылгъан проектни чеклеринде Тёбен Чегемде, Яникойда, Нартанда эм Шалушкада амбулаторияланы да тапландырлыкъдыла. Звёздныйде уа жангы мекям сюелтилинирикди.  

Андан сора да, муниципалитетни автопаркы жангыртылырча да тийишли эс бурулады. Ол санда быйыл медицина учреждениялагъа энтта да беш машина берилликди. Аланы хайыры бла узакъ элледе саусузлагъа чырмаусуз барыргъа, онгсузланы ара больницагъа тапдырыргъа да онг табылылкъды.