«Адам не заманда да билим алыргъа итинирге керекди»

Булунгучу жаш Сарбашланы Аскер драма театрны алчы артистлеринден бири болуп тургъанды. Аны «Чонай», «Тартюф», «Философияны доктору», «Учхан жулдуз» эмда башха спектакльледе ойнагъан рольларыны хайырлары бла таныгъандыла къараучула. Дагъыда концертледе Аскер жырлары бла къууандырады. Ол бюгюн бизни ушакъ нёгерибизди.

- Аскер, театр бла байламлы ишни къалай сайлагъанса? Кёпле ол усталыкъгъа уллу магъана бермейдиле.

- Сабийлигимде тюрлю-тюрлю кинолагъа къарап, артистлени ойнагъанларын жаратып тургъан эдим. Школда, Маданият юйде бардырылгъан байрамлагъа да дайым къатышханма. Абадан класслада болгъанымда уа, ол муратымы бир жанлы этип, кесими тарых жаны бла окъуугъа хазырлагъанма. Ставропольну къырал университетине документлерими бергенимде, къарындашым Мызыланы Аубекир, аз тюрлю болмайды деп, СКГИИ-де «Актёрское искусство» факультетге да бердирген эди къагъытларымы.

 Ахырында уа юйде экисине да киргеними билгенлеринде, узакъгъа баргъандан эсе, мында къалсам тийишли кёредиле. Алай бла актёргъа окъуп башлайма.

Диплом ишибизде тёрт тюрлю спектакль кёргюзтюрге керек эдик. Бизни юйретген Атмырзаланы Магомет эки спектакльде да баш жигитлени рольларына мени тийишли кёреди, къалгъан экисинде да магъаналы персонажланы суратларгъа буюргъан эди.

Ызы бла окъууну да бошагъынчы Малкъар къырал драма театргъа ишлерге чакъырадыла. Ол кезиуде энди салына тургъан «Ревизор» спектакльде эки роль да берген эдиле. Аны бла тенг а сабийлигимден бери барыргъа итинип тургъан «Балкария» ансамльде къауум заманны тепсеп тургъанма.

 - Сахнада бир-бир артистле бираз абызырагъан этедиле, сёзлени унутуп да къоядыла. Сенде уа алай болуучумуду?

- Кертисин айтханда, мен орус бёлюмде окъугъаным ючюн, таулу театрда келишалырмамы деп, сагъыш эте эдим. Студентлени арасында ойнагъанлыкъгъа, мында уа кесимден абаданла, бютюнда профессионалла болгъанына сагъышлана эдим. Бираздан ангылагъан эдим, окъууда бла театрда бардырылгъан спектакльлени бир бири бла тенглешдирирча тюйюлдю. Нек дегенде профессионал адамла бла ишлеген тынчды, кесинг да аладан кёп жангы затха юйреннгенлей тураса. Репетициялада къыйналмайса.

 Аны айтханым, окъууда бираз къоркъсам да, мында коллектив иги болгъаны ючюн, сахнада бир кере да абызырамагъанма. Берилген рольланы билип, къараучулагъа иги танытыргъа, эслеринде къалырча ойнаргъа керекме деген сагъыш келеди эсиме жангызда. Сёзлерими да репетицияда билип къоюучума.

- Жырлаб а къачан башлагъанса? Юйюгюзде уа бармыдыла сенича фахмулары болгъанла?

- Анам, аны жанындан бир къауум эгечим да къобузда уста согъадыла, атам а – гитарада. Сабийлигимден бери да анга тынгыларгъа бек сюйгенме. Бир ауукъ замандан а кесим да юйреннгенме.

 Сахнада жырларма деб а хазна эсиме келмегенди. Театрда ишлегенлени союзу жырлагъан артистлени араларында конкурс бардырыучуду. Бизден да ары юч адамны жиберирге керек эдиле. Ол кезиуде Гергокъаланы Халиматны бла Мызыланы Аубекирни сайлайдыла, ючюнчюге уа мени тийишли кёредиле. Башийланы Фатима къобуз согъуп «Тиширыула» деген жырны айтхан эдим.

 Кёпле жырлагъанымы жаратханы ючюн, кесими бу жаны бла да сынаргъа умут этеме. Мени аллай итиниуюмю эслеп, Жангоразланы Мажит бла Мамайланы Фатима концертлеге къатышырча «Ариуум» деген жырны бередиле. Биринчи кере жангы жылгъа аталгъан «Акъ байрам» концертде жырлайма. Андан сора уа Мызыланы Мурадин бла «Къайда сюйгеним, къайда» деген жырны да жаздыргъанбыз.

- Сахнагъа, къарслагъа юйреннген адам аны излегенлей турады, дейдиле. Сен да алаймыса?

- Бу ишни сайлайма дегенимде, жууукъларымдан биреу да айтхан эди къарслагъа юйренип къалсанг, аланы къуруда излегенлей турлукъса деп. Алай боллукъ тюйюлме дегениме да, юйреннгеними уа ангылайма.

- Театрдан, сахна жашаудан кетип къалыр умутунг барды деп эшитгенме.

- Мени сагъышыма кёре, адам бир жерде туруп турургъа керек тюйлдю, не жаны бла да ёсерге керекди. Театр иги болгъанлыкъгъа, башха ишледе да кесинги кёрсенг, билим алсанг, айнысанг игиди.

 Алай сахнаны къояргъа демейме. Арт заманда эски, унутулуп тургъан жырланы жангыртып, макъамларын да тюрлендирип, жангы жашау берген адет чыкъгъанды. Аны мен да бек жаратама. Аны себепли аллай жырланы жангыртып, тынгылаучуланы къууандыра турургъа сюеме. Гитараны согъуп эки жыр да хазырлагъанма.

Дагъыда бизни эски адетлерибиз унутула барадыла, ол затла бютюнда тойларыбызда эсленедиле, ала барысы да бирча ётедиле. Аны себепли бир жууугъуму тоюнда гяпчи болуп, адамланы ойнатып тургъан эдим. Андан бери кёпле аны жаратып, керти да кесибизни адетлерибиз сейир болгъанларын ангылап, тойларына чакъыргъанлай турадыла. Мен да анга бек ыразыма.