Эсепле къууандырадыла, этилирге керек жумушла да кёпдюле

Къабарты-Малкъарда жол мюлкню игилендириуге аслам эс бурулады. Беш жылны ичинде «Къоркъуусуз эм тынгылы автомобиль жолла» миллет проектге кёре минг километр  чакълы бирде жоллагъа тынгылы ремонт этилгенди, юч жюз километрде чыракълы чыпынла салыннгандыла. Буруннгу жылда окъуна тийишли ишле жыйырма беш элде   баргъандыла. Аны чеклеринде  регион магъаналы жолланы  токъсан километрден асламысы  мардалагъа келиширча болгъанды.

Былтырны юсюнден айтханда да, планда белгиленнген  жумушла тамамланнгандыла. Ол санда, регион магъаналы жолладан сора да, муниципалитетледе болумну игилендирирча мадар этилгенди.  Аланы  кёбюсюнде мурдорларын кючлерге, асфальт жаяргъа эм къоркъуусузлукъну  жалчытыргъа тюшгенди.

Алай бла сагъынылгъан кезиуде, миллет проектни себеплиги бла алтмыш километрде жолла тап халгъа келтирилгендиле. Ол санда тынгылы ремонт  ишле Огъары Малкъарны Мухол тийрелеринде, Терк районну  Арик элинде эм   Нальчикде  Мовсисян орамда баргъандыла. Жолладан сора да, башха сооруженияла да игилендириледиле. Сагъынылгъан кезиуде  Прохладный – Эльбрус жолда эм Заюковода кёпюрле жангыртылгъандыла.

Эллени араларында  жерлеге да къаралгъанды, жолла айбат эм къоркъуусуз болгъандыла. Бу жол тийишли ишле Хабаз, Акъ-Суу, Огъары Басхан, Элбрус, Заюково, Зарагиж, Светловодское, Каменномостское, Псынадаха, Аргудан, Нарткала, Ерокко, Экинчи Лескен, Ново-Ивановское, Каменка эи Шалушка элледе ётгендиле. Андан сора да, «Комплекс халда эл жерлени айнытыу» федерал программагъа кёре Солдатское элде тёрт километр чакълы бирде эки участок игилендирилгенди.

Бюгюнлюкде Экинчи Чегем-Булунгу жолну  27 километрине  тынгылы ремонт этиле турады. Чегем чучхурланы къатында эки километрде темир чигинжиле уруп, бетондан къалын хуна къуюп, черек жагъаланы кючлейдиле. Тикледен бла  жарладан    таш, топуракъ оюлмазча да этиледи. Ол быйылны ахырына битерикди. Болсада участокну саулай 2026 жылгъа бошар акъылдадыла.  Аны баш сылтауларындан бирлери къыйын тау жерлени эм черекни жагъасын кючлерча аслам заман къоратыргъа тюшгениди.  

Нальчикде уа тынгылы ремонт этилген  эм уллу объектледен бирине  Мовсисян орамны санарчады. Алгъа заманда  Прохладна, Май районлагъа эм башха жерлеге баргъанланы шахарны Къабарты эм Идаров орамларына  уллу ауурлукъ салгъандыла. Энди уа аланы санын жыйырма беш  процентге азайтыргъа жарагъанды. 

КъМР-ни Транспорт эм жол мюлк министерствосу жолда къоркъуусузлукъ жалчытылынырча  аслам бурады.  Анга кёре былтыр токъсан километрде кече жарыкъ болурча этилгенди, Т7 светофорлары бла элли беш «зебра» жарашдырылгъанды, тогъуз километрде темир буруула тартылгъандыла. Жорукъланы билдирген  2,5 минг белги орнатылгъанды эм  288 минг метрде ызла тартылгъандыла,  27 километрде уа  тротуарла  ишленнгендиле.   Сагъынылгъан эмда башха  жумушланы хайырындан жолда аварияланы саны 27,6 процентге азайтылгъанды.

Эсге сала айтсакъ, республика миллет проектни тири бардыргъаны ючюн арт юч жылда федерал даражада саугъаланмай къалмагъанды.  КъМР-ни Транспорт эм жол мюлк министерствосунда  мындан арысында  белгиленнген ыздан таймай, салыннган борчланы тынгылы толтурургъа  кюрешириклерин белгилегендиле.