Кавказ халкъланы назмулары - орус тилде

 Алгъаракълада  Дондагъы Ростов шахардагъы Юг федерал   университетде «Шуёхлукъну жанлары»  проектни чеклеринде «Кавказгъа мамырлыкъ» деген антологияны презентациясы болгъанды.  Кавказда жашагъан халкъланы  орус тилде шёндю басмаланнган назмуланы антологиясын къурагъан эмда  автору Дуния Артий комитетни вице-президенти, КъМР-ни культурасыны сыйлы къуллукъчусу, Къабарты-Малкъарда  «Россейни культура фронту»  бёлюмню башчысы, поэт, жамауат къуллукъчу Ауес Бетугановду.

Китапны презентациясына къатышыргъа кёпле келгендиле. Аланы араларында: Юг Федерал университетни юйретиу эмда жаш тёлю проектлени жашауда бардырыу жаны бла  проректору Яков Асланов, ол окъуу юйню  социология эмда  региноведения жаны бла институтну директору Андрей Бедрик, филология илмуланы доктору,  институтда миллет культурала жаны бла доцент Инна Ковтутенко, тарых илмуланы кандидаты Николай Трапш, дагъыда кёп башха белгили алимле  къатышхандыла. Республикадан ары Долинскедеги Марко Вовчокну атын жюрютген юйю-музейни директору, чыгъармачы жаш тёлюню насийхатчысы, Россейни халкъларыны артиадасыны  лауреаты Инесса Лажараева, назмучу Радима Нагоева да баргъандыла. Сёзсюз, презентациягъа Юг Федеральный университетни студентлери да тири къатышхандыла. Ала анда кеслерини назмуларын да окъугъандыла.

Презентацияны кезиуюнде кёп алимле да сёлешгендиле, арт жыллада поэзиягъа кёп фахмулу жаш адамла келгенлерин да белгилегендиле.

Дагъыстан Республиканы Левашинский районундан «Тауланы ауазы» деген  фольклор ансамбль а жырлап, жыйылгъанланы къууандыргъанды.