«Бу тамашалыкъны кёргенибизге къууандыкъ»

Кёп болмай Къабарты-Малкъаргъа биринчи кере келген къонакъла бла тюбеширге тюшгенди. Ушакъ эте келгенибизде, Виктор Иванович  Кирочкин бла аны юй бийчеси Надежда Александровна Астраханьдан келгенлерин  билгенме.  Ала Долинскде «Джамиля» къонакъ юйде тохтагъан эдиле. Республикабызны, Нальчик шахарны да  кёп айбат жерлерин кёргенлерин, кёпле бла тюбешгенлери айтхандыла.

«Бюгюн а Чегем чучхурлагъа келгенбиз. Бизде быллай тамашалыкъ табийгъат жокъду.  Аламатды жеригиз, адамларыгъыз да. Чегем чучхурлагъа уа алыкъа жетмегенбиз. Машинабызны былайда къоюп, кесибиз ары дери бу тёгерекде къаялагъа къарай, суратха тюшюре барайыкъ, деп тохтагъанбыз», - дейди Кирочкина Надежда Александровна.

Хапар айта келгенде, къонакъ тиширыу пенсиягъа чыкъгъынчы сабий садда, аны таматасы болуп  ишлеп тургъанын, энтта да ишлерге къолундан келлик эди, алай сабийлери  солугъуз, боллукъду ишлегенигиз, заманыгъыз келгенди, жолоучулукълагъа айланыгъыз, тенгиз жагъасына барыгъыз деп, къоймай, ишден чыкъгъанын да айтады.

«Бизде кёрген затларыгъыздан бютюн бек нени жаратхансыз», - деп сорама. «Адамларыгъызны, - деп жууаплайды олсагъат. -.Къайры барсакъ да, не сорсакъ да, жик-жиги бла айтып берирле, бир огъурлу, ариу тилли адамла жашайдыла мында. Сизни аллайла  болургъа юйретгенми этедиле. Айгъа жууукъ заман а турабыз , бир жерде, бир затха  хыны этген адамгъа тюбемегенбиз. Долинскде  базаргъа да баргъанбыз, бюсюреген затымы кёрюп, айтхан багъасын эшитгенимде, арсарлы болама да, сатыучу тиширыу а ненчагъа сюйсенг да ал, дегенди. Мен а аны алай айтханы ючюн, ол айтхан багъаны бергенме товар ючюн».

Ала къонакъ юйлерин да бек жаратханларын айтхандыла. «Хар не да тизгинли, тап, ариу. Ашханада аш-суу да  татыулу эмда татымлыды. Ма бир затха чурум табайым десенг да, табаллыкъ тюйюлсе. Мында тургъан кюнлерибиз бек зауукълу эдиле, кёп затны кёрдюк, кёпню билдик, адет-тёрелеригиз бла шагъырейлендик.  Шахарыгъыз, адамларыгъыз а эсибизден бир кюннге да кетерик тюйюлдюле. Онг бар эсе, газетигизни юсю бла  окъуучуларыгъызгъа,  республиканы адамларына, «Джамиля» къонакъ юйде ишлегенлеге бизни атыбыздан ыспас этигиз, бек тилейбиз», - дегендиле.