Къар юзюлдю эсе

Бусагъатда Минги тауну  тийресинде  лыжалада учаргъа сюйгенле асламдыла. Алай таулада кюн алдаулуду,  аны себепли адамладан сакълыкъ, эслилик да изленедиле. Аны бла байламлы МЧС-ни регионда Баш управлениясы къар юзюлгенде къоркъуусузлукъну жорукъларын эсгертиуню дурус кёргенди.

 Алай бла, учаргъа жангызда белгиленнген жерледе жарайды, къар къыстау жаугъанда, кюн бузулгъанда жолгъа чыгъаргъа эркин этилмейди. Таулада сиз боллукъ жерледе къар юзюлюрге къоркъуу болгъанын бла къалгъанын сурагъыз, курт терекле бла чырпыла ёсмеген тик жерледе тюшюучюдю, аллай жерледен узагъыракъ туругъуз.

Курт юзюлюп келе эсе, алгъа угъай, бир  жанына  къачыгъыз,  жаш тереклени артларында букъмагъыз, къая тюбюнде таша жерчикле бар эселе, алагъа жетерге кюрешигиз. Къачаргъа заман жокъ эсе, тобукъларыгъызны къарыныгъызгъа къысып жатыгъыз. Женгигиз неда боюнлугъугъуз бла бурунугъузну бла ауузугъузну жабыгъыз.

Куртну ичине тюшгенден сора аны, къолларыгъыз бла жюзгенча этип,  къыйырында тыш жанында къалыргъа кюрешигиз. Курт тохтагъандан сора солургъа хауа болурча, бетигизни бла кёкюрегигизни тёгерегин къардан тазалагъыз.  Теберге онг бар эсе, башына чыгъыгъыз. Аны ичинде къычырмагъыз, къар тауушну тышына жиберлик тюйюлдю, алай жылыу, хауа, къарыуугъуз да бошаллыкъдыла. Тюнгюлмегиз, жукъуну къачырыгъыз, курт тюбюнден адамланы бешинчи кюн окъуна саулай тапхан кезиуле аз тюйюлдюле.