Пенсиячыланы къайгъылары эмда къууумлары

Нальчик шахарны пенсиячыларыны союзуну  Искож тийресиндеги «Молодёжный» микрорайонда биринчи организациясыны таматасы Галина Пакды. Ол бизни ушакъ нёгерибизди. Уллайгъан адамланы жашауларын бирле айтып билмейди: ала бла ишлегенли  жыйырма жылдан иги да атлагъанды.

Галина Ивановна билдиргеннге кёре,  Пенсиячыланы союзуна 876 адам киреди, аладан 567-си искожчуладыла. «Жарсыугъа, пенсиячыланы бир къаууму союзну магъанасын ангыламайдыла, ол не жумушла тамамлагъанын билмейдиле. Биз а  ала бла дайым да тюбешип, ушакъ этебиз, алагъа керекли законланы ангылатабыз, ол жаны бла специалистлени консультацияларын хакъсыз  къурайбыз»,- дегенди.

 Анга шагъатха ол союзгъа киргенлеге эсгертиуле жазылгъан  къагъытла юлешиннгенлерин да айтханды. Алада саулукъ сакълауну  академиясы, сейирлерине кёре тюбешиуле, дагъыда тюрлю-тюрлю юридический консультацияла алыр ючюн, къайры барыргъа керек болгъаныны юсюнден билдириледи.

Организациягъа ахча болушлукъ тилеп  келгенле да бардыла, жарсыугъа, жамауат организацияны  алай этерге онгу жокъду. «Газгъа, суугъа, электрокючге да хакъны заманында тёлеялмай, борчлары уллу болгъанла кёпдюле. Барысына да болушалмасакъ да, бир-бирлерине мадарла этерге кюрешебиз»,-дегенди.

Биригиуню таматасы пенсиячыла бла ишге чырмау этген сылтауланы да келтиргенди. Жангыз къалгъан къартланы алдаргъа  сюйген хыйлачыла бардыла. «Ахча бла да жалчытырыкъма, кесинге да къарарыкъма»,- деп, фатарларын къолгъа этерге сюйгенле тюбейдиле. Къартла уа, аллайладан къоркъуп, эшиклерин бир кишиге да ачмай тохтайдыла.  «Бирде адам ёлюп эсе да, къалып эсе да билген къыйын болады. Анга да бир мадар этерге керекди. Бизни микрорайонну атына «Молодёжный» деп аталгъанлыкъгъа,  анда къартла кёпдюле. Ала алгъын электровакуум  заводда, «Искож» комбинатда ишлегенледиле. Районда иги жанына тюрлениуле болурла деп сакълайдыла»,- дегенди Галина Ивановна.

Ол аланы ишлерине пенсиячыланы республикалы союзуну алгъыннгы таматасы  Черкесланы Георгий уллу себеплик  этип тургъанын да чертгенди. «Бюгюннгю председатель Юрий Маремович Барсагов да  аллына  бир тюрлю жумуш бла барсакъ, угъай демейди, сау болсун. Солуу паркны генеральный директору Шауаланы Таубийни жашы Эльдар да  тилеклерибизни толтурмай къоймайды. Алагъа аны ючюн  ыразылыгъымы билдиреме»,- дегенди.

Районда болумну юсюнден да айтмай болалмагъанды ол. Мында жаш адамлагъа деп бир тюрлю спорт  комплекс, культура  ара жокъду. Алгъын бу тийреде паркда  ишлеген Холаланы Жюнюсню жашы Борис аны тап халгъа келтирип, абериле да орнатыргъа кюрешгенди. Алай, ол кетген бла хар зат да  башха тюрлю болгъанды. Алайда кафе ишленнгенди, сабийле, абаданла да солурча онг да кетгенди.  «Родина» кинотеатрны  аллында право низамгъа бузукълукъ этилген кезиуле да кёп болуучу эдиле, насыпха бусагъатда ала иги да азайгъандыла.

Галина Ивановна  Президент айырыуланы юслеринден да оюмун айтханды. «Пенсиячыла къыралны аллай магъаналы ишлерине не заманда да тири къатышхандыла, бу жол да алай боллугъуна ишексизме. Ангылатыу ишни башлагъанбыз. Мени жаланда бир тилеригим барды: уллайгъанлагъа айырыу участкалагъа барыргъа кимлеге улоу бла себеплик этилсе, кимлеге уа жол хакъ тёлетилмесе бек иги боллукъ эди»,- дегенди.

Холаланы Марзият.
Поделиться: