Хунерлилени белгилегендиле

Къабарты-Малкъар къырал университетде «Тамаша гуржабала-2023» деген республика даражалы сурат ишлеу эришиуню эсеплери чыгъарылгъандыла. Анга уа 290 адам къатышхан эди. Алчыланы эмда призёрланы тизмелеринде Созайланы Амирхан бла Холамханланы Джамиля да бардыла.

Амирхан Акъ-Сууну онбешинчи номерли школунданды, Джамиля уа Нальчикни  генерал Зокаланы  Валерий атлы сегизинчи номерли мектебини окъуучусуду.

Бу эришиуге тири къатышханлары ючюн бир къауум школ «КъМКъУ-ну ёлюмсюз полку» деген китап бла саугъаланнгандыла. Ол а ара шахарыбызны алтынчы, онунчу эмда онбешинчи номерли мектеплерине берилгенди.

Эсигизге салайкъ, бу эришиу КъМКъУ-ну орус тил эмда маданият илму-билим бериу арасыны таматасы Надежда Чайкинаны башламчылыгъы бла къуралгъанды.  Эришиуню жюриси билдиргеннге кёре уа, анга къатышханла берилген борчланы тынгылы тамамлап, белгили гжель, хохлома дегенча эмда бирси ызлада ишлей билгенлерин ачыкълагъандыла.

Сабийлени саугъалау жумушлагъа хурметли къонакъла да къатышхандыла. Аланы араларында уа Пятигорск шахарда «Пушкинни юйю Кавказда» музейни илму къуллукъчусу Наталья Бойко, КъМКъУ-ну орус эмда битеулю тил билим кафедрасыны башчысы  Башийланы Светлана, университетни социал-гуманитар институтуну директоруну юйретиу эмда усталыкъгъа тюшюндюрюу жаны бла орунбасары Анежа Кушхова, башхала да болгъандыла.