Билимлерин ёсдюрюрге чакъырадыла

Россейни МИД-ини къыралыбызны ара шахарында халкъла аралы байламлыкъла институту бла ООН-нга болушлукъ этген Россей ассоциация Къабарты-Малкъар къырал университетни студентлерин ООН-ну Москвада халкъла аралы Виталий Чуркин атлы моделине къатышыргъа чакъырадыла. Ол 14-19 апрельде МГИМО-ну мекямында (Москва, Вернадский атлы проспект, 76) бардырыллыкъды.

Бу сагъынылгъан  конференция Россейде, тыш къыраллада да кенг  белгилиди. Жыл сайын да анга дунияны башха-башха жерлеринден сегиз жюз чакълы адам къатышханлай турады. Тюбешиуню кезиуюнде онбеш комитетни ишлери орус, ингилиз, француз, испан, арап, къытай тилледе къураладыла эмда бардырыладыла.

Кенгешлени тийишли даражада болурларын жалчытыр ючюн, секретариат анга къатышырыкъланы арасында сайлауланы  уа адамла конференциягъа барыргъа жазыла тургъан кезиуде окъуна къурайды. Ол жазылыу а былтыр ноябрьде башланнганды эмда быйыл мартны ахырына дери созуллукъду.

Андан тышында да, тюбешиуге барлыкълагъа анга хазырланырча тренинглеге жюрюрге эсгертиуле этиледиле. Ала уа  Модельни ишни асламысы къуралгъан тиллеринде-орус эмда ингилиз-бардырыладыла. Аланы (тренинглени) кезиулеринде къошакъ халда хайырлы билдириуле этиледиле эмда аланы заманында чыкъгъан соруулагъа жууапла бериледиле.

Модельни юсюнден толу билдириулени эмда анга къатышыр ючюн заявканы къалай жарашдырыргъа тийишлисини https: modeun.  pu сайтда табаргъа боллукъду.

Трамланы Зухура.
Поделиться: