Къар юзюлюрге къоркъуу алыкъа кетмегенди

«Эльбрус» курортну тау-лыжа эмда канат жоллары жабылып тургъанлы ючюнчю кюн барады. Аны сылтауу ол тийреледе къар юзюлюрге уллу къоркъуу чыкъгъаны бла байламлыды, деп билдиргендиле курортну администрациясындан.

Хауа болум осалгъа кетгени ючюн тау-лыжа ызланы шабат кюн окъуна жабаргъа оноу этилгенди. Ыйых кюн къар аясуз жаугъаны эмда тауладан юзюлюрге уллу къоркъуу чыкъгъаны ючюн  ол оноуну созаргъа тюшгенди.

Алгъаракълада МЧС-ни КъМР-де Баш управлениясыны пресс-службасы да Къабарты-Малкъарда тауладан къар юзюлюп тюшерге боллугъуну юсюнден къаты  эсгертген эди.

Жылны узуну ишлеп тургъан "Эльбрус" курорт Минги тауну къыбыла жанында «Приэльбрусье» табийгъат паркны тийресинде орналыпды. Аны лыжа ызлары бла подъёмниклери 17 километр чакълы бирни тутадыла.