Миллетлени араларында келишиулюкню сакъларгъа алланып

КъМР-ни Миллетлени ишлери эмда жамауат проектле жаны бла  министерствосу бардыргъан «Коммерциялы болмагъан эм иги  организация» деген  конкурсда  республиканы Маданият фонду  быйыл бла ючюнчю кере хорлайды. Аны юсюнден бу кюнледе бардырылгъан отчёт жыйылыуда айтылгъанды.

Анда сёлеше, фондну таматасы Люаза Макоева быллай шартла келтиргенди: республикада  190 миллетни келечиси жашайды. Ала  ёз культураларын эмда динлерин тутадыла, ана тиллеринде сёлешедиле. Фонд онеки  миллет маданият ара эмда алты  жамауат организация бла къаты байламлыкъда ишлейди. Жаланда быйыл  фонд 68 тюрлю-тюрлю иш бардыргъанды. 

– Биз туугъан жерлеринден узакъда жашагъан миллетлеге не жаны бла да, ол санда адет-тёрелерин, тиллерин сакълаугъа, алагъа жаш адамланы юйретиуге, аланы кенг жайыугъа да себеплик этебиз. Ёсюп келген тёлюню патриот ниетде юйретиуге,  миллетлени эмда динлени араларында келишиулюкню сакълаугъа да энчи эс бурабыз. Ол жаны бла тюрлю-тюрлю лекцияла, семинарла, илму конференцияла кёп санда бардырылгъандыла, – дегенди Люаза Магомедовна.

Ол маданиятда бла санасатда къуллукъ этгенлени туугъан кюнлерине жораланнган чыгъармачы ингирле, тюбешиуле да фондда терк-терк бардырылгъанларын да айтханды. «Бизни шуёхларыбыз кёпдюле, ала фондну  терк-терк жокълайдыла, халкъларыны  адет-тёрелерин кёргюзтюр, башха миллетлени келечилери къалай жашагъанларына къарар, билир ючюн келедиле», – дегенди.

Быйыл бек уллу ишледен бирине уа, докладчы айтханыча, миллет культураланы «Кючюбюз бирликдеди» деген III республикалы фестивальны санаргъа боллукъду. Ол фондну «Биз биргебиз» деген проектини чеклеринде бардырылгъанды, анга КъМР-ни Миллетлени ишлери эмда жамауат проектле жаны бла министерствосу, Нальчик шахарны жер-жерли администрациясыны жаш тёлю политика жаны бла бёлюмю себеплик этгендиле. Фестивальгъа битеу миллет арала къатышхандыла, республиканы районларындан, шахарларындан келечиле да келгендиле. Аланы барысына да фондну таматасы жюрек ыразылыгъын билдиргенди, Халкъла аралы черкес ассоциацияны башчысы Хаути Сохроковха, малкъар халкъны «Алан» жамауат организациясыны таматасы Жаболаны Жабраилге энчи ыспас этгенди.

Жыйылыуну кезиуюнде оруслуланы «Вече» миллет биригиуюню  башчысы Роман Литвинов да сёлешгенди эмда  «Вече» къуралгъанлы 34 жыл болгъанын эсгертип, аны башламчысы Анатолий Канунниковха  ыспас этгенди. Люаза Макоевагъа да тамата тёлю башлагъан ишни жетишимли бардыргъаны ючюн жюрек ыразылыгъын билдиргенди.

Эстонлуланы «Кодумаа» маданият араларыны башчысы Марет Романи Люаза Магомедовнагъа Эстонияны РФ-да консулу Расмус Миллер республикада болгъанында къол салгъан бюсюреу письмону бергенди. Консулну дипломуна дагъыда РФ-ни халкъ артисти Наталья Гасташева, 1-чи номерли музыкалы школда ишлеген Светлана Мез, Зарема Унажокова да тийишли болгъандыла.

Ол кюн Маданият фондну дипломлары жамауат ишге тири къатышхан къауум адамгъа да берилгендиле. Аланы алгъанланы араларында КъМР-ни сыйлы артистлери  Таукенланы Галина, Ирина Даурова, устаз Хаджиланы Фатимат, жаш жырчыла 

Атабийланы Алибек, Алим Карданов, миллет культура араланы башчылары да бардыла. 
Жыйылыуну ахырында уа концерт кёргюзтюлгенди.