Тюз сайлау этерча

Къабарты-Малкъар Республиканы «Кёп жумушланы тамамлагъан жаш тёлю арасы» КъМР-ни Жаш тёлюню ишлери жаны бла министерствосуну себеплиги бла «Проф.ток» деген усталыкъ сайларгъа болушуу жаны бла ярмарка къурагъандыла.

 Ол Къулийланы Къайсын атлы Малкъар къырал драма театрда бардырылгъанды. Ары Москвадан тестированияны эм айнытыуну «Гуманитар технологияла» арасыны эм Maxsimum Education федерал билим берген компанияны экспертлери келгендиле. Ала жаш адамлагъа профессионал тестированияланы берип, къайсы ызгъа итиниулери болгъанын ачыкъларча амалла этгендиле. Алыкъа сайлау этмегенлеге уа консультация бла болушхандыла. Тюрлю-тюрлю бёлюмлени, къыралда вузланы юслеринден да хапарлагъандыла.

 Тюбешиуде кёп школчула туугъан жерлеринде вузланы сайларгъа сюйгенлерин билдиргендиле. КъМКъУ-ну, КъМКъАУ-ну, СПО-ну эм бюгюнлюкде республикада билим берген башха вузланы келечилери да ала бла ушакъ этгендиле. Къаллай факультетле болгъанларын, анда окъургъа къайсы дерслени игирек билирге кереклисин да айтхандыла. Аланы учрежденияларына келирге сюйген школчуланы мындан ары да сорууларына жууапла табаргъа амаллары боллугъун да билдиргендиле.

 Шимал Кавказда белгили предприятияла бла организацияла уа ярмаркагъа къатышханлагъа къаллай ишчи жерлери болгъанларыны, не бла кюрешгенлерини юсюнден да айтхандыла. Мастер-классла кёргюзтюп, чыгъаргъан продукциялары бла шагъырейлендиргендиле.

- Быллай тюбешиуле школну бошай тургъан жаш адамлагъа иги амалдыла. Аланы хайыры бла сабийле мындан ары жашауларында къайсы усталыкъны сайласала иги боллугъун кёредиле, барыргъа сюйген вузларыны келечилери бла танышадыла. Тюбешиуден сора кёп школчу, абызырамай, профильни сайлап, керекли ЕГЭ-леге хазырланып башлайды аланы жетишимли бередиле. Быллай ахшы жумушну уа мындан ары да жыл сайын бардыра турургъа умутлубуз,- дегенди огъарыда сагъынылгъан министерствону келечиси Атмырзаланы Амина.

Дагъыда «Проф.ток» ярмарканы чеклеринде школчула регионда белгили предприятиялагъа экскурсиягъа барлыкъдыла, аланы ишлерин  кеси кёзлери бла кёрлюкдюле.