Сакъланнган хорламла, кёллендирген такъыйкъала

Республикабызны спортчулары, округ,  къырал, халкъла аралы эришиулеге къатыша, атларын айтдырадыла, хорламлары бла республикабызгъа да махтау келтиредиле. 

Иван Ярыгинни, Россейни, Европаны, дунияны да чемпионатларында, континентле аралы кубокда майдалла къытхан Мусукаланы Исмайылны аты эркин тутушууну тарыхына киргенди. 
Хасаниячы спортчуну эм уллу хорламларындан бири уа кесини ауурлукъ къауумунда Венгриягъа Олимпиадада эркин тутушуудан эришиуге къатышыргъа эркинликни къоруулагъаныды. Эсигизге салайыкъ, талай жыл мындан алгъа ол, спорт жаны бла инсанлыгъын тюрлендирип, Венгрия ючюн эришеди. 
Быйыл а Мусукаланы Исмайыл дунияны чемпиону болгъанды. Тутушууну олимпиада тюрлюлерини «United World Wrestling» деген халкъла аралы федерациясы аны ол жетишимин 2023 жылда эм игиге санагъанды.

Жылны ахырында тутушууну ММА тюрлюсюнден жетишимли спортчубуз Тюменланы Альберт АСА-ны Гран-приини финалына чыгъар ючюн сермешгенди. Анда ол жарым ауурлукъда айтхылыкъ дагъыстанлы Устармагомед Гаджидаудов бла тюбешгенди. Белгилисича, Альберт бу тюбешиуню эрттеден сакълай эди эм анга тынгылы хазырланнганды. Гаджидаудов да кеси ауурлугъунда бек кючлюледен бириди. Быйыл ол 3 тюбешиу ётдюргенди эм аланы экисинде да хорламла болдургъанды. Тюмен улуну юсюнден айтханда, ол 25 тюбешиуде алчы болгъанды эм тёртюсюнде хорламны ычхындыргъанды. Бу жолгъу сермешде хорласа уа, Альберт жангыдан сыйлы бел бау къоллу да бола эди. Дагъыстанлы жаш да кючлюледен бири болгъанын унутмай, Альберт сермешни ахыр раундуна дери бардыргъанды. Анда уа, ол бошалыргъа 5 секунд къалгъанлай, Устармагомедни нокдауннга ашырып, бел бауну Къабарты-Малкъаргъа къайтаргъанды.

Тырныауузчу Локияланы Жамболат грек-рим тутушууда болдургъан жетишимлери бла белгилиди. Ол къыралны чемпионатларында эм халкъла аралы эришиуледе, Иван Поддубныйны мемориалында кёп кере хорлагъанланы эм саугъаланнганланы къауумуна къошулгъанды, Европаны, дунияны кубокларында майдалла къытханды, Европалы миллетлени кубогун алгъанды, Россейни спортуну халкъла аралы устасыды. 

Быйыл да Жамболат хорламлары бла къууандыргъанды. Киров шахарда Сергей Миронович Кировну хурметине аталгъан эришиуде алчы болгъанды.
Совет Союзну Жигити Александр Аксёновну хурметине Новосибирскде ётген «Возрождение» эришиуге 8 къыралдан 200-ден аслам атлет къатышхандыла, анда жерлешибиз «кюмюшню» алгъанды. Красноярскда Олимпиада оюнланы чемпиону Алексей Шумаковну саугъаларына 40-чы битеукъырал эришиуде, Россейни Жигити генерал-лейтенант Роман Кутузовну хурметине аталгъан турнирде да Жамболат кесини ауурлугъунда эм кючлю болгъанды. 

Гуппойланы Алина дзюдода, самбода, сумода, бел бауладан тутуп тутушууда жетишимлери бла атын айтдыргъанды. Быйыл а анга бел баудан тутуп тутушуудан «Россейни спортуну устасы» деген ат берилгенди. 

Жаш дзюдочу Цийкъанланы Ислам къатышхан эришиулеринде майдалсыз къалмаучуду. Быйыл да ол округ, къырал, халкъла аралы эришиуледе жетишимли болуп къайтханды. Алай бла, Нижний Новгородда Россейни кубогуна къыралны 45 регионундан 380-нге жууукъ дзюдочуну араларында Ислам (66 кг.) да сынашханды эм экинчи болгъанды. Красноярскда Иван Ярыгинни атын жюрютген спорт арада дзюдодан алтын эм тюрсюнлю темирле жарашдыргъан заводну директору Владимир Гулидовха аталгъан «А» класслы тёрели эришиуде «доммакъ» къоллу болгъанды. 
Россейде дзюдону мурдорун салгъан Василий Ощепковну хурметине Хабаровскда «Платинум арена» арада ётген «Russian Judo Tour» халкъла аралы турнирден да «кюмюшню» келтиргенди. Новокузнецк шахарны «Богатырь» спорт арасында Кузбассда дзюдону мурдорун салгъан адамладан бири – Александр Бебениннге аталгъан битеуроссей эришиуде да экинчи болгъанды.