Аны поэзиясыны от жагъасы бюгюн да жылытханлай турады

Белгили къабартылы поэт, прозаик, КъМР-ни культурасыны сыйлы къуллукъчусу Лиуан Губжоков туугъанлы сексен беш жыл толгъанды. Анга жоралап бу кюнледе А.Шогенцуков атлы Къабарты къырал драма театрда чыгъармачылыкъ ингир болгъанды.

Поэтни хурметине жыйылыугъа кёп белгили инсан келгенди. Анда Лиуан Мухамедовични жашау жолуну, чыгъармаларын да эсгергендиле. Тюбешиуню ача, КъМР-ни культура министри Мухадин Кумахов Губжоковну чыгъармаларын уллула, сабийле да бирча сюйюп окъугъанларын, аны назмулары терен магъаналы болгъанларын, хапарлары уа адамны кёлюн жарытханларын энчи чертгенди.

Келгенлени поэтни жашау жолу бла да танышдыргъандыла. Лиуан Мухамедович 1937 жылда Жемталада туугъанды. КъМКъУ-ну тарых-филология факультетин тауусхандан сора типографияда корректорну ишин бардыргъанды, ызы бла Н.К. Крупская атлы къырал китапханада ишлегенди. «Волны Черека» деген биринчи назму китабы 1961 жылда басмаланнганды. Ишден къачмагъан жаш студент кезиуюнде колхоз ишлеге да уллу эс бургъанды, тири уруннганы ючюн ЦК ВЛКСМ-ни сыйлы грамотасы бла саугъаланнганды. Къазахстанны тын жерлеринде эки жылдан артыкъ ишлегенди, ол кезиуде танышханды артда аны эм иги нёгери боллукъ Социалист Урунууну Жигити Жангуразланы Ибрагим бла да. Ол шуёхлукъларына атап кёп назмула да жазгъанды. Эсгериу ингирде ол чыгъармаланы да окъугъандыла.

Къайсы поэт да адамны, аны жашауун, къыйынын да энчи кёре биледи. Лиуан Губжоковну да биринчи китабыны назмулары окъуна ишчи инсанлагъа, аланы къыйынларына жораланнганын белгилегендиле. Жазыучу  сабийлени да бек сюйгенди. Алагъа деп кёп назмула, хапарла да жазгъанды, аланы санында окъуучула сюйген «Мальчишки нашего села» деген сатира жанрлы хапарлары. Алай бла ол къабарты сабий литератураны айныууна да уллу къыйын салгъанды.

 Къабартылы жазыучуну чыгъармачылыгъын Къулийланы Къайсын да бек жаратханын айтып, аны: «Багъалы Лиуан, сени поэзиянгы оту кюнден-кюннге жарыкъдан-жарыкъ жана барады, окъуучуланы жюреклерин да жылытханлай турады», - деген сёзлерин да эсгергендиле.

Эсгериу ингирде Лиуан Мухамедовични жыйылгъанланы кёллерин жарытхан аламат назмуларын, башха чыгъармаларын да окъугъандыла. Аны кёп назмусуна макъам салынып, ала бюгюнлюкде белгили жырла болгъандыла, келгенлени алагъа тынгыларгъа онглары да болгъанды.

- Бюгюн бу жыйылыугъа келгенлени барыгъызгъа да сау болугъуз дейме. Фойеде кёрмюч, аламат ингир къурагъанлары ючюн а КъМР-ни Культура министерствосуна бла республиканы Жазыучуларыны союзуна ыразылыгъымы айтама. Атам хар инсанны да къууандырыргъа, кёлюн жарыкъ этерге излегенди, хар чыгъармасы да гитчелени, абаданланы да бирликге, тюз жолгъа чакъырыргъа деп жазылгъанды, бюгюн биз эшитген аны хар тизгини да аны толу ачыкълагъанды. Ол: «Поэт адам жюреклени инженериди», - деучю эди, бу тюбешиу да анга шагъатды, - дегенди Лиуан Губжоковну жашы Алим.

Темуккуланы Амина.
Поделиться: