Жетишимле болдургъанланы саугъалагъандыла

«Иш кёллю Россей» жамауат организацияны Къабарты-Малкъарда бёлюмю да къошулуп бардырылгъан «Деловая высота - 2023» конкурсуну эсеплерин бу кюнледе чыгъарып, хорлагъанланы саугъалагъандыла. Бизнес-премиягъа къатышыргъа сюйгенледен жетмишден артыкъ заявка берилген эди. Алагъа уа «Иш кёллю Россей» эмда «Россейни таянчагъы» жамауат организацияланы, сора дагъыда КъМР-ни Сатыу-алыу – Промышленность палатасыны келечилеринден эксперт къауум къарагъанды. Саугъаланы уа къырал эмда муниципал власть органланы, Парламентни, предприятияланы эмда организацияланы келечилери бергендиле.

Жамауатха аш этиу жаны бла эм иги предприятиягъа Жангоразланы Асият таматалыкъ этген «Къонакъ» ресторанны эмда «Ик'ра» кафени башчысын Зарина Варитлованы санагъандыла. Башха-башха номинациялада дагъыда быланы белгилегендиле: Информациялы технологияланы IThub колледжни башчысы Созайланы Ибрагимни (it/финтех бёлюм), Экинчи номерли шахар клиника больницаны башчысы Ботталаны Залинаны (медицина сфера), «Маяк» санаторийни башчысы Мамайланы Галинаны (Жылны эм иги тиширыу предприниматели), «O2kislorod» глэмпинг-паркны башчысы Мушкаланы Маратны (Жетишимли биринчи атлам), «MUNIRA» деген чыгъармачылыкъ мастерскойну иеси Жулабланы Мунираны (миллет тёрелени эмда усталыкъланы сакълаугъа эмда айнытыугъа къошумчулукъ этгени ючюн), «Кулинарланы Шимал-Кавказда Ассоциациясы» ООО-ну башчысы Чеченланы Бисону (Тёрелени сакълау ючюн).