Къолдан усталаны кёрмючю

Москвада аз алгъаракъда къолдан усталаны «Ладья. Къыш жомакъ - 2023» деген ат бла кёрмюч-ярмаркасы ётгенди. Ол бизни къыралыбызны миллетлерини культураларын байыкъландыргъан, аланы араларында шуёхлукъну  кючлендирген  белгили жумушду, дегендиле КъМР-де «Мени бизнесим» арада.

Къабарты-Малкъардан а анда юч предприниматель болгъанды. Регионну бирикген стендинде агъачдан, къайишден абериле, илляула да бар эдиле.

Предпринимательледен бири «Munira»  мастерскойну иеси Жолабланы Мунирады. Ол агъачдан абериле этеди, аланы къоллары бла жасалайды. Гаврилюк Наталья къайишден этген затларын кёргюзтгенди. Ол аланы «Къызгъылдым-сары айыу» деген ат бла чыгъарады. «Болушханлары ючюн Къабарты-Малкъарны «Мени бизнесим» арасына сау болугъуз дерге сюеме. Мындан арысында да арабызда байламлыкъла сакъланырына ышанама», -дегенди ол. Ючюнчю предприниматель а Рустамбек Вороковду. Аны «BRO» деген мастерскою барды. Жаш да къайишден абериле жарашдырады.

Эсигизге салайыкъ: бизни къыралда миллет чыгъармачылыкъланы бар тюрлюлерин ачыкълагъан, къараучуланы ала бла шагъырейлендирген жаланда «Ладья» кёрмючдю. Анда битеу дуниягъа айтылгъан: Гжель, Федоскино, Холуй, Мстёра, Хохлома, Городец, Кизляр, Златоуст, Кубачи, Жостово, Торжок, Кадом, Вологда, Елец, Михайлов эм башха чыгъармачылыкъ араланы ишлерин кёрюрге боллукъду.

Бу жол кёрмючге минг бла жарым организация, уста, биригиу эмда суратчы къатышханды.  Предпринимательлерибизни ары барыу бла байламлы жумушларына «Мени бизнесим» ара къарагъанды, къоранчларын да кеси боюнуна ол алгъанды.

Бу Ара не жаны бла билеклик этгенин билирге сюе эсегиз, ары барыгъыз. Аны адреси: Нальчик, Киров атлы орам, 224. Телефон номери: 8(800) 222-51-07.