РФ-ни оноучусуна бары да бирча къабыл кёргендиле

«Единая Россияны» келечилери Владимир Путинни кандидатурасы 2024 жылда къыралны президентин айырыулагъа кёргюзтюлгенин бирча тюзге санагъандыла. Ол жаны бла оноу партияны XXI съездинде чыгъарылгъанды. Аны ишине Владимир Путин да къатышханды.

Партияны башчысы Дмитрий Медведев съездни пленар жыйылыуунда Президент   сайлаулада хорлар ючюн «Единая Россия» къолдан келгенни этеригин чертгенди.

- Къыралны политика жашауунда магъаналы иш жууукълашады – Президент айырыула.  Къыйын кезиуде къыралыбызны келир заманы ючюн жууаплылыкъны алыргъа хазыр адамны. Миллетни башчысын, жамауат ышаннган адамны. Къыралыбызны айнырын, кючлю, жалынчакъсыз болурун сюйгенлени бирикдирген адамны. Тёрелеге кертичи, аны бла бирге уа келир заманнга ышаннгылы къарагъан къыралны оноучусун. Ата журтубуз ёмюрлеге ма аллай болургъа керекди, - дегенди Дмитрий Медведев.

Ол Президент тамамлагъан жумушлагъа кертичи бола, партия борчларын битеу онгларын хайырланып толтургъанын белгилегенди.

- Башчылыкъ партиядан сурам да башхады. Бизни салыннган муратлагъа жетиширге онгларыбыз, мадарларыбыз да бардыла. Адамланы аллында ариу сёзле айтхан бла чекленмей, керти ишле толтурабыз, - деп къошханды партияны оноучусу.

Дмитрий Медведев «Единая Россия» Владимир Путиннге болушур ючюн, битеу сынауун, онгларын да хайырланырыгъын чертгенди.

- Къыралны жамауаты ышаннган, хурмет этген башчыбыз хорлар ючюн, битеу кючюбюзню саллыкъбыз. Ол Россейни жангы жашаууну, жетишимлерини, ышаннгылы айныууну заманы боллукъду. Къыралыбызны къоркъуусузлугъуна, жалынчакъсызлыгъына къажау тургъан кючле тохтатыллыкъ кезиудю. Россейни келир тёлюлери жашауларына ышаннгылы эм къууанчлы къарар ючюн, битеу онгла къураллыкъдыла. Алай боллугъуна ишексизме, - деп чертгенди партияны башчысы.

Владимир Путин партияны келечилерине ыразылыгъын билдиргенди. «Биз барыбыз да биригип, сынауладан къутулгъанбыз, жетишимле болдургъанбыз. Мындан ары да Россейни ырахматлы жашауу ючюн тамамланыллыкъ жумушла кёпдюле. Бюгюн хар бирибизге да уллу жууаплылыкъла салыннгандыла. Ала тарых магъаналы борчладыла десем, жангыллыкъ тюйюлме. Аланы толтурур ючюн а, Ата журтубузну сюйген битеу политика кючле биригирге керекдиле. «Единая Россиягъа», бизни жанлылагъа, къыралыбызны кёп миллетли жамауатына, битеу регионлагъа, социал, профессионал къауумлагъа   мындан ары къадалып ишлерге, жетишимле  болдурургъа тюшерикди, - дегенди РФ-ни Президенти.

Бюгюнлюкде экономиканы, социал сфераны, илму-техника онгланы айнытыргъа, россейли юйюрлени къолайлыкъларын игилендирирге кереклисин чертгенди Владимир Путин.

- Бек алгъа уа бирлик керекди. Бизни айыргъан затланы унутургъа керекбиз. Битеу оноуланы кесибиз, тыш къыралла къатышмай чыгъарлыкъбыз. Россей жалынчакъсыз, кесини излемлерин жалчытхан къыралды. Аны акъылыбызда, жюрегибизге сакъларгъа борчлубуз. Мындан ары да «Единая Россия» жамауатны бирикдирген оноула чыгъарлыгъына ишексизме, - дегенди къыралны оноучусу.

Ол партияны жамауат хурмет этген адамла, кеслерини усталыкъларында алчыла, волонтёрла, энчи аскер операцияны ветеранлары бла бирге ишлерге чакъыргъанды.

- Бизни кёп нёгерлерибиз – партияны келечилери, аны жанлыла, депутатла фронтда болгъандыла, неда шёндю Ата журтубузну къоруулайдыла. Партияны волонтёрлары аскерчилеге, фронтха, мамыр адамлагъа, жангы регионланы жамауатына болушадыла. Батыр, жигит адамларыбыз, кеслерини ыразылыкъларыр бла къуллукъ этгенле, волонтёрла кёпдюле. Тюрлю-тюрлю сфералада ишлеген, борчха, туугъан журтубузгъа кертиликни кеслерини юлгюлеринде кёргюзтгенле да асламдыла. Ала бизни байлыгъыбыздыла, къыралыбызны мурдорудула, - дегенди Президент.

Ол партияны келечилерин Юйюрню жылына тири къатышыргъа, аналыкъны, сабийликни, тёрели хазнабызны кючлеу, насийхатчылыкъны айнытыу жаны бла башламчылыкъла этерге чакъыргъанды.  «Ол Россейни демография болумуна, миллетни сакълаугъа артыкъда магъаналыды», - деп къошханды.

Дагъыда партияны халкъ программасын андан ары жашауда бардырыуну, айырыула аллы программалагъа инсанланы тилеклерин къошууну юслеринден да айтханды.

- Айырыула аллы программагъа саулукъ сакълауну биринчи бёлюмюн айнытыуну, спортну инфраструктурасын игилендириуню, алача башха сорууланы къошаргъа керекди. Россейни инсанлары бла бирге къыралыбызны айнытыуну узакъ болжаллы стратегиясын къурарыкъбыз, - дегенди РФ-ни оноучусу эмда къыралны бирлигин, халкъны сейирлерин жалчытыуда мындан ары да партия бла хайырлы байламлыкъла жюрютюллюклерине ийнаннганын айтханды.

Съездде «Единая Россияны» генсоветини башчысы Андрей Турчак да сёлешгенди. Ол партия Президентге тутхучлулукъ этгенине къыралны инсанлары ыразы болгъанларын чертгенди. «Партия айырыулагъа тири къатышырыкъды, кандидатыбызгъа не жанындан да болушурукъду. Тышындан кючлеге къол кётюрюуге къатышыргъа онг бериллик тюйюлдю», - дегенди ол.

Партияны съездине КъМР-ни Башчысы Казбек Коковну таматалыгъында делегация къатышханды.  «Единая Россияны» регион бёлюмюню толтуруучу комитетини башчысы, КъМР-ни Парламентини депутаты Дмитрий Парафилов Владимир Путинни 2024 жылда РФ-ни Президентине кандидатха кёргюзтюлгенине бирча ыразылыкъ айтылгъаны съездни баш магъаналы эсеби болгъанын чертгенди.  «Аны партияны башчысы Дмитрий Медведев да айтханды пленар жыйылыуда. Президент партияны халкъ программасын шёндюгю болумну эсге алып, андан ары да тамамларгъа кереклисин эсгертгенди. Партияны иши социал магъаналылай къалады. Къыралны инсанларыны ырахматлы жашауларын жалчытыу бизни баш борчубузду», - дегенди Дмитрий Парафилов KABARDIN-BALKAR.ER.RU сайтха.