Сабийлени кёллерин жарытхан проектле бла къууандырады

Мокъаланы Гульнара жетишимли таулу къызларыбыздан бириди, кёп сейир проектлеге да тири къатышханлай турады. Алгъаракълада уа Москвада бардырылгъан «Гуру кухни» деген телепередачада да болгъанды. «Ол бериуге «Ашхананы» бардыргъанымы кёрюп чакъыргъан эдиле. Анда командада юч адам болады. Биргеме Шауаланы Разият бла Адель Калмыкова келген эдиле. Конкурс тынч тюйюл эди. Кёп тюрлю ашарыкъла бериуде къурап, биширирге керек эди. Жыйырма эки команданы ичинде экиничи жерге тийишли болгъан эдик», - дейди ол.

 Андан сора да, озгъан жыл бир конкурсха къатышханды. Интернетде хыярны ичине тюрлю-тюрлю тахта битимле салып биширгенин кёрюп, чакъыргъан эдиле аны ары. Алай бла Москвада жашагъан абаданла бла, сабийле бла да хыярдан мантыла эм башха сейир ашарыкъла биширгендиле. Ол жумушха къатышыргъа сюйгенле кёп болуп, эки кюннге сексен килограмм хыяр кетген эди.

Биригиуню башчылары уа жаратып, таулу къыз Москвада быллай проектни айгъа эки кере бардырып турса сюйгенлерин айтхандыла. Алай ара шахаргъа барып тургъан тынч болмагъанын билдирип, Гульнара ол оноугъа ыразы болмагъан эди.

Дагъыда ара шахарда бардырылгъан тюрк миллетлени араларында «Жомакълы чоюнчукъ» фестивальда да болгъанды. Анда халкъыбызны азыкълары бла танышдырыргъа, аланы къалай этилгенлерини, тарыхыны юсюнден да айтыргъа керек эди.

- Хычинле, локъумла, сохтала, хыбыртла, айран да хазырлагъан эдим. Дагъыда хар миллетден да бир студент къошулуп,  хычинле бла байламлы мастер-класс да кёргюзтген эдим. Азербайджанлы жашчыкъ аланы барысындан терк, тап биширип биринчи жерге тийишли болгъан эди, - дейди ол.

Дагъыда Гульнараны «Азимут» къонакъ юйде бардылыргъан  «Мастер-класс Ашхана» проектини юсюнден да энчи айтырчады. Анга битеу республиканы сабийлери къатышадыла, сейир затлагъа юйренип, сыйлы къагъытлагъа да тийишли боладыла. Бу проектни ол, сабийлени аналары айтып,  2019 жылда башлагъанды. Биринчи кере аны алты сабий бла бардыргъан эди, анда  пахлава бла котлетле биширгендиле. Ызы бла уа ол жумушха да къошулургъа сюйгенле кёпден-кёп болуп, ал ботала жетмегенлей башлагъанда,  Муртазланы Лариса себеплик этип,  дагъыда отузусун тикдиредиле. Бюгюнлюкде Азимутда ол жумуш терк-терк бардырылгъанлай турады. Ары тёрт-беш жылчыкълары болгъан сабийле да келедиле. Аны себепли аланы да сейирлери болурча азыкъла этедиле.

 - Дагъыда бюгюнлюкде белгили татлы гюл къысымланы да хазырлайбыз. Ол къысымны башы гюлле угъай, тюрлю-тюрлю конфетле боладыла. Аланы да сабийле кеслерини оюмларына кёре келишдирип жыядыла. Ол а устазгъа берсенг да, сыйлы саугъады, аланы биринчи сентябрьге эм башха байрамлагъа этдириуючюме. Андан сора да, сабийле сюйюп кюрешгенлери – тюрсюнлю мантыладыла. Аланы саулукъгъа заран тюшюрген бояуладан угъай, чюгюндюрню, шпинатны сууун, куркуманы къошуп этебиз. Хар мастер-классха да гитчеле къууанырча, аланы бу усталыкъгъа сюймекликлери ёсерча амалла къурагъанлай турама,- дейди ушакъ нёгерибиз.

Аны бла къалмагъанлай, Гульнара Нартанны интернатында ёксюз сабийлеге да мастер-классла бардырады. «Бир-бир сабийлени, насыпха, аналарын келтирип, кёллерин жарытыргъа амаллары барды. Жарсыугъа, жылыусуз къалгъан сабийле да асламдыла, аланы унутургъа жарамайды. Аны ючюн, интернатха барырдан алгъа, биргеме келип болушургъа сюйгенле бар эсе сурашдырама.  Сау болсунла, бу жумушха кёпле тири къатышадыла», - дейди ол. Ала сабийлеге керек затла, татлы аш-суу да алып элтедиле. Андан сора да, ала бла  мастер-классда ашарыкъла этип, ала бла бирге олтуруп, ушакъ этип, сыйлап, кёллерин жарытадыла.

Итиниулю къызыбыз, аны бла чекленип къалмагъанлай, ахшы жумушун мындан ары да бардырып туругъа умутлуду. «Мистер бла Мисс хозяюшка» республикалы конкурс болуп тургъанды, ол энди аны регионла аралы даражада бардырыргъа кёлленипди. Къоншу республикаладан сабийлени да къошаргъа сюйгенин билдиреди ол. Анда хорлагъанла уа Москавада боллукъ конкурсха къатышырыкъдыла. Анда биригиулени башчылары, Гульнараны проектин жаратып, ара шахарда да бардырыргъа онг этериклерин билдиргендиле.