Иш хакъла къайсы бёлюмде игидиле?

 Быйыл къайсы усталыкълада уруннганланы айлыкъ хакълары иги болгъаныны юсюнден билдиргендиле ишчи кадрла жаны бла кюрешген HH.ru интернет-порталдан. Алай бла барындан да кёп – «дата-сайентистле», фрезеровщикле, аналитикле, машинистле, риелторла эмда прорабла аладыла. Аланы орта айлыкълары 100 минг сомдан атлайды. Тизмени эм башында уа DevOps-инженерледиле, 214 минг сомлары бла.

Тизмеге тюшген усталыкъла эм аланы айлыкълары (минг сом): дата-сайентист (202,5 минг), системный аналитик (150,9 минг), программист, разработчик (129,9 минг); жеринден тепдирилмеген мюлк сатыучу агент (124,4 минг), геодезист (122,7 минг), брокер (121,6 минг), машинист (118,4 минг), проектлени баш инженери (118,3 минг), продуктла аналитик (115,7 минг), геолог (109,6 минг), BI-аналитик, аналитик данных (107,4 минг), токарь, фрезеровщик, шлифовщик (106,4 минг), бизнес-аналитик (105,2 минг), прораб, къурулуш-монтаж ишлени мастери (104,5 минг).

Оноучулагъа энчи тизме жарашдыргъандыла. Топ-менеджерлени арасында барындан да кёп (193,5 минг сом) жарашдырыучу къауумлагъа таматалыкъ этгенле аладыла. Ызы бла была барадыла: информациялы технологияла жаны бла башчыла (151,5 минг сом), коммерция эмда финансла башчыла (151,4 минг сом), тамамлаучу эмда генеральный башчыла (150 эм 147,1 мингишер сом).

Тинтиулеге кёре, ишлеген инсанланы экиден бирине премияла бередиле, 43 проценти уа аллай затны бир кере да кёрмегендиле. Регионлагъа къарагъанда, башхаладан эсе кёбюрек Волгоград областьда эмда Ханты-Мансийск автоном округда ишчилени, сора дагъыда сатыу-алыу, инвестицияла эмда консалтинг бла кюрешгенлени онгдурадыла. Тизмени тюбюнде уа Омск областьда, Красноярск крайда эмда Кубаньда уруннганладыла. Башха усталыкъла бла тенглешдиргенде, туризмде, ресторанлада, медицинада, рекламада эмда PR-да ишлегенлени премияла бла артыкъ терк къууандырмайдыла.

РАН-ны Социология институтунда чыкъгъан тинтиулеге («Воспроизводство специалистов интеллектуального труда: социологический анализ» монография) кёре Россейде бегирек изленнген специалистле – ветеринарладыла. Алагъа иш тапхан къыйын боллукъ тюйюлдю. Ол да сейир болмаз: бизни къыралда юй жаныуарланы саны бек кёпдю, малчылыкъ да иги атламла бла ёсе барады.

Гуманитар усталыкълагъа уа сурам доюн тюйюлдю. Ол а къуру бизде угъай, битеу жер башында проблемады – быллай специалистлеге экономикада жер аздан-аз бола барады.