НАЗЫ ТЕРЕКНИ САЙЛАРГЪА ТЫНЧ ТЮЙЮЛДЮ

Жангы жыл жууукълаша келгени бла тюкенледе эм базарлада назы терекчиклени сатып башлагъандыла. Ол байрамны баш шартларындан бири болгъаны себепли, аны хар юйюрде да жасаргъа итинедиле, алай назыны кертисими огъесе жалгъанымы иги болур?

Бюгюнлюкде жамауатны кёбюсю керти назы терекчикни алыргъа сюедиле. Аны баш сылтауларындан бири уа байрамгъа энчи къууанч къошханыды. Ариу, дарман ийиси бютюнда аламатды. Айтыуларына кёре, ол хауада бактерияланы ёлтюреди эм нерваланы да тынчайтыргъа болушады. Алай бирде аны ийисинден неда ийнеси этинге чанчылса, сабийлени, уллуланы да аллергиялары къозгъалыргъа боллукъду, бютюнда отоуда кёп заманны турса.   

Керти назыны игисин сайларгъа тынч тюйюлдю, бирде аны алыргъа ата-анала сабийлерин да алып барадыла. Кёпле, эм биринчиден, аны субайлыгъына, багъасына эс бурадыла. Кюнле бла отоуда сюелсе, саулукъгъа заран келтирмезми деп а киши сагъыш этмейди, тийишли къагъытланы да сормайдыла. Андан сора да, ол кёп кюнлени къууандырырча, саулукълу болургъа керекди. Аллайны ийнелери жап-жашил болады, уусанг а, жаулары чыгъып, ариу ийис этедиле. Бутакълары хыбыл, кесилген жери да къаралып башлагъан эсе уа, аны кёп сюелмезлигин билигиз. Белгилисича, назы жанаргъа ёчдю, аны ючюн гирляндаланы хайырланнганда сакълыкъ артыкъ боллукъ тюйюлдю.

Назы кёп заманны саргъалмай турурча адамла тюрлю-тюрлю амалланы хайырланадыла. Аладан бири аспиринни бир таблеткасын сууда эритип, анга гитче къашыкъны буруну бла туз, дагъыда аллай бир шекер къошуп, юзмезде къатышдырып, терекни тюбю аны ичине 15-20 сантиметрге кёмерге керекди. Андан сора да, юсюне тер-терк суу чачдырыла турса сюеди.   

Жалгъан назы терекчикни энчиликлеринден бири аны жыл сайын хайырланыргъа жарагъаныды. Бирде аны кезиую он жылдан да атлайды. Тюкенледе аланы кёп тюрлюлери барды, бир-бирлерин а кертиледен да айыраллыкъ тюйюлсе. Ол жашиллей турады, ийнелери тюшмейдиле, кеси да терк жанмагъан материалладан этиледи.     

Алай жалгъан назыны да кемчиликлери барды. Сёз ючюн, ол бийик качестволу стандартлагъа кёре этилсе да, аны къурамы тюрлю-тюрлю химияла къошулгъан пластикден жарашдырылады. Бир-бирде уа аны къурамына адамны саулугъуна заран салгъан затла да киредиле. Аны юсюнден а кёбюсюнде этикеткасында жазылмайды. Ол себепден, эм биринчиден, жалгъан назы бир тюрлю ийис этмезине эс бурургъа керекди. Ала туруп, сертификат качествосу бар эсе да сурагъыз. Интернет-тюкенден алгъан эсегиз а, эм биринчиден, коробканы ачып, хар неси жете эсе къарагъыз. Жаратмасагъыз, аны жети кюнню ичинде къайтарыргъа боллукъсуз.