Жигитни атын жюрютген орамда жашагъаныгъыз къаллай сезимле туудурады?

Республикабызны ара шахары Нальчикни кёп орамлары Журтубузну белгили адамларыны атларын жюрютедиле, аладан бирине Совет Союзну Жигити Байсолтанланы Алимни аты берилгенди. Ол туугъан жерлерин къоруулай ёлген комсомолчуланы эсгертмелери орнатылгъан майданда башланады. Батыр лётчикни атын жюрютген орамда жашагъан, ишлеген адамладан Жигитни юсюнден соргъанбыз, ала бу орамда тургъанлары къаллай сезимле туудургъанын билгенбиз.

Черкесланы Зухура:

- Байсолтанланы Юсюпню жашы Алим къазауатха 1941 жылда киргенди, Совет Союзну Жигитиди, 4-чю гвардия истребитель авиаполкну командирини орунбасарады. Ол чынтты жигитди! Душманны кёкде, жерде да ууатханды. Жашлыгъына къарамай, 1943 жылда - 24 жылында ол эскадрилияланы командирлерин хазырлау курсланы ётгенден сора, алада къалып, лётчиклени хазырларны орунуна, полкга къайтып, фашистле бла уруш этерге кетгенди. Андан сора кёп бармай ол Ата журтуну азатлыгъы ючюн жанын бергенди. Мен оюм этгенден, ол къанлы урушха къатышханла, бири къалмай, эм жигит, хурметге эм тийишли адамладыла. Жангыз да ала артха турмагъанлары ючюн жашайбыз биз бюгюн. Аллай Жигитни аты аталгъан орамда жашагъаным манга, башхалагъа да уллу насыпды. 

Фатима Абазова:

- Манга 80 жылдан атлагъанды, бу орамда эрттеден бери жашайма.  Байсолтанланы Алимни юсюнден билмей а! Ол айтхылыкъ лётчик, ариу, субай адам болгъанды. Жарсыугъа, дуниядан жашлай кетгенди. Бюгюн мамыр кёкню тюбюнде айлана, таза хауа бла солуй эсек – Алим анга къошумчулукъ этгенди. Олду, аныча адамладыла бизге эркин жашауну келтиргенле.

Чофанланы Мухарби:

- Байсолтанланы Алим кёргюзтген батырлыкъны, ётгюрлюкню шёндю хазна киши къайтаралыр. Орамгъа, школгъа да аны аты бошдан берилмегенди. Совет Союзну Жигити деген атха Север Кавказдан биринчи ол тийишли болгъанды. Кёкде душманны ууата, ол Хорламны жууукълашдырыргъа кюрешгенди. Ол миллетини чынтты уланыды, аны атын жюрютген орамда жашагъаныбыз а бизге уллу ёхтемликди.

Лариса Приходько:

- Байсолтанланы Алим аты, айхай да, бегилиди. Ол лётчик болгъанды, жауну аслам самолётун ууатханды, алай бла кёплени ёлюмден сакълагъанды, къыралы ючюн жанын бергенди. Аныча адамланы атларын орамлагъа, парклагъа, башха жерлеге бериу бек керекли, огъурлу да ишди. Бютюнда аны магъанасы ёсе келген тёлюлени юйретиуде уллуду – жаш адамларыбыз, сабийле тарыхны билирге, алагъа мамыр жашауну келтирген адамланы эсгерирге, аладан юлгю алыргъа керекдиле. Уллу Ата  журт урушха къатышхан аскерчилерибизни юслеринден айтханда, ала хорлам ючюн кюрешде артха турмагъанлары, ёлюмден-отдан къоркъмагъанлары ючюн уллу хурметге тийишлидиле. 

 Гузеланы Зурият:

- Байсолтанланы Алимни жашау жолуну, жигитлигини юсюнден мен, айхай да, бек иги билеме. Мен аны атын жюрютген орамда жашайма, аны аты бла ишленнген школда окъугъанма. Бизни школубузну белгиси ол уруш этген «ЯК-18У» самолётду. Аны юсюнден окъуй, эшите, жигитлигини аллында баш урама. Бизге мамыр кюнню келтирир ючюн, Байсолтанланы Алим, аны биргесине уруш этгенле эм уллу багъаны тёлегендиле – жашауларын бергендиле. Аллай адамланы атлары ёмюрледе сакъланыргъа, жангызда россейлилени угъай, ала фашизмден къоруулагъан битеу къыралланы гражданланы эслеринде турургъа тийишлидиле.